Жорий йил 22 ноябрь куни соат 15:30 атрофида Бухоро вилояти, Ромитан тумани ДСИ солиқ инспектори Суннат Жумаев ҳамкасби Ҳусниддин Хайриддинов билан туманнинг «Навоий» маҳалла фуқаролар йиғини ҳудудига жисмоний шахсларнинг солиқ қарзини ундириш учун боради. Бу ҳақда Солиқ қўмитаси матбуот хизмати хабар бермоқда.
ДСИ ходимлари «Хайробод» канали ёнидан ўтиб кетаётганларида чўкаётган ёш болани кўриб қолади. Суннат Жумаев зудлик билан машинани тўхтатиб, ҳеч иккиланмай ёрдам бериш мақсадида ўзини сувга отади. Ҳаво ҳарорати 2 даража совуқ бўлишига қарамай, Суннат Жумаев чўкаётган болани қутқариш учун муздек сувга шўнғийди.
Болани қирғоққа олиб чиқади. Канал атрофида йиғилган аҳоли вакиллари уни таниб, зудлик билан кийимини алмаштириш ва исиниб олиши учун уйига олиб кетадилар.
Аниқланишича, қутқариб қолинган бола Шаҳромбек Зарипов бўлиб, у Ромитан туманидаги 1-сонли умумтаълим мактабининг 3-синфида ўқийди. Ўша куни у ўқишдан қайтаётган маҳал сув солинган идиши — термосни тўсатдан каналга тушириб юборади.
Уни олиш илинжида бола тез оқаётган, паст ҳароратли сувга тушиб, тўғри ҳаракатлана олмайди. Шу вақтда солиқ ходими уни қутқариш учун ёрдамга ошиқади.
Шаҳромбекнинг яқинлари ўз фарзандининг ҳаётини сақлаб қолгани учун Суннат Жумаевга миннатдорлик билдирди. Ҳозирда бола ўзини яхши ҳис қилмоқда, соғлиғига ҳеч қандай зарар етмаган.
Давлат солиқ қўмитасининг буйруғига асосан Суннат Жумаевга кўрсатган жонбозлиги учун фахрий ёрлиқ ва солиқ хизматининг I даражали инспектори унвони навбатдан ташқари тақдим этилди.
Изоҳ (0)