Олий Мажлис Қонунчилик палатасининг Фан, таълим, маданият ва спорт масалалари қўмитасида янги таҳрирдаги «Таълим тўғрисида»ги қонун лойиҳасини иккинчи ўқишга тайёрлаш ишлари давом этмоқда.
Парламент қуйи палатаси матбуот хизматининг маълум қилишича, қонун лойиҳаси юзасидан ўтказилган навбатдаги муҳокама жонли баҳс-мунозараларга айланиб кетди. Унда депутатлар, тегишли вазирлик ва идоралар ходимлари ҳамда ишчи гуруҳи аъзолари қатор таклиф-тавсиялар билдирди.
Қайд этилишича, ҳукумат томонидан киритилган таълим тизимига жисмоний шахсларнинг якка тартибда педагогик фаолият билан шуғулланиши — репетиторлик ҳақидаги норма ишчи гуруҳи аъзоларининг кескин танқидига сабаб бўлган.
Жумладан, Олий Мажлис Қонунчилик палатаси депутати Шуҳрат Бафаев ушбу норма амалдаги қонуннинг предмети бўлмагани сабабли мазкур қонун лойиҳасида қолиши мақсадга мувофиқ эмас, деб ҳисоблаган.
Шунингдек, махсус малакага эга бўлган шахслар репетиторлик билан шуғулланиши мумкинлиги ва ушбу фаолиятни амалга ошириш учун юридик шахс мақомига эга бўлиш ҳамда лицензия олиш талаб этилмаслигини иштирокчилар танқид қилган.
Мавзуга доир: Таълим тўғрисидаги қонун лойиҳасининг янги таҳририда ўқитувчиларни мажбурий меҳнатга жалб этиш тақиқланди
Унинг айтишича, бу мустақил равишда билим олишнинг алоҳида кўринишидир. Бундай таълим якунида репетиторлар диплом ёки сертификат бермайди, ўқитиш услублари Давлат таълим стандартларига мос келмайди. Мазкур масалалар ушбу қонунда тартибга солиниши керак.
Муҳокамадан сўнг ишчи гуруҳи аъзолари қонун лойиҳаси юзасидан республиканинг ҳар бир ҳудудида муҳокамалар ташкил этиш зарурлиги, интернет тармоғида ҳам жамоатчилик фикрини ўрганиш кераклиги, олим ва экспертлар хулосаларини олиш зарурлиги ҳақида якдил фикрга келган.
Изоҳ (0)