Бухоро вилоятида автобус билан тўқнашган Nexia-2 ҳайдовчиси ва 2 нафар йўловчиси ҳалок бўлди. Бу ҳақда ИИВ ҳузуридаги Тергов департаменти хабар бермоқда.
Қайд этилишича, воқеа бугун, 29 ноябрь куни тахминан соат 07:00 ларда содир бўлган. 22 ёшли ҳайдовчи Х.С. Nexia-2 машинасини Бухоро вилояти Жондор тумани ҳудудидан ўтувчи «Тошкент—Қорақалпоғистон» А-380 йўлининг 305 километрида ҳайдаб кетаётганида бошқарувни йўқотиб, қарама-қарши йўналишга чиқиб кетиб, ушбу йўналишда келаётган Higer русумли автобуснинг олд қисмига урилган.
Оқибатда Nexia-2 ҳайдовчиси Х.С. ва 2 нафар йўловчиси 19 ёшли Р.С., 49 ёшли М.М. ҳодиса жойида вафот этган. Автобус ҳайдовчиси ва йўловчилари тан жароҳати олмаган.
Мазкур ҳолат юзасидан Бухоро вилояти ИИБ ҳузуридаги Тергов бошқармаси томонидан Жиноят кодексининг 266-моддаси 3-қисми «а» банди (Одамлар ўлимига олиб келган, транспорт воситалари ҳаракати ёки улардан фойдаланиш хавфсизлиги қоидаларини бузиш) билан жиноят иши қўзғатилган.
Ҳозирда ушбу жиноят иши бўйича дастлабки тергов ҳаракатлари олиб борилмоқда.
Аввалроқ, автомобилларга техник хизмат кўрсатиш устахонасида 3 та машина ёниб кетгани ҳақида хабар берилган эди.
Изоҳ (0)