Польша миллий банки Буюк Британиядан 100 тонна олтинни олиб чиқиб кетиш бўйича катта ҳажмдаги операцияни ўтказди. Олтинлар 1939 йилда Иккинчи жаҳон уруши бошланган вақтда Британияга юборилганди. Полякларнинг хазинани қайтариш операцияси махфий равишда ўтган, деб ёзмоқда RMF24.
Ўтказмани амалга оширишга бир неча минг одам жалб қилинган, асосан банклар хавфсизлик хизмати ходимлари катта ҳажмдаги ишни бажарган. Қуйма олтинлар ноябрь ойи давомида самолётларда Польшага ташилган ва Варшава ҳамда Познанидаги аэропортларга олиб келинган.
Аэропортга келтирилган юклар мовий рангдаги юк машиналарда ўнлаб ҳарбийлар ҳимояси остида Польша олтин захирасига қўшиб қўйилган. Юкнинг умумий ҳажми тахминан 4,2 миллиард еврога баҳоланмоқда. Маблағнинг муайян қисми Англия марказий банкининг жорий ҳаражатлари учун ушлаб қолинган.
Польша олтинни уруш даврида Англияга Украина, Руминия, Туркия, Сурия, Ливан ва Франция орқали олиб ўтган ва олтин қарийб 80 йил инглизларда сақланган.
2019 йилнинг июль ойи ҳолатига Польшанинг олтин захираси 228,6 тоннани ташкил қилади. Мамлакат бу борада Европада 11, бутун дунёда эса 22-ўринда туради.
Изоҳ (0)