Хитой Халқ Республикаси ташқи ишлар вазирининг ўринбосари Чжен Сзегуан АҚШнинг Хитойдаги элчиси Терри Бренстедга АҚШ сенати ва вакиллар палатаси томонидан қабул қилинган «Гонконгда инсон ҳуқуқлари ва демократия тўғрисидаги» қонун лойиҳаси сабаб норозилик нотасини топширади, дейилади Хитой ТИВ баёнотида. Бу ҳақда «РИА Новости» хабар берган.
АҚШ вакиллар палатаси депутатлари ўтган ҳафтада «Гонконгда инсон ҳуқуқлари ва демократия тўғрисидаги» қонун лойиҳасини қабул қилган, аввалроқ сенат ҳам ушбу ҳужжатни маъқуллаганди. Қонун имзоланиши ва кучга кириши учун АҚШ президенти Дональд Трампга киритилган.
«Гонконг иши Хитойнинг ички сиёсий масаласи ҳисобланади, ҳеч бир хориж давлатининг ушбу жараёнга аралашишига ҳақи йўқ. АҚШ ушбу қонун лойиҳасини ишлаб чиқиш орқали очиқдан очиқ ХХР ишларига аралашмоқда, ҳақиқатни инкор этиб, қорани оқ деб, халқаро ҳуқуқ меъёрларига амал қилмаган ҳолда Хитойга қарши кайфият уйғотишга уринмоқда. Хитой ҳукумати бундан норози ва ушбу ҳаракатга эътироз билдиради», — дейди Чжен Сзегуан имзолаган ТИВ баёнотида.
Пекин Вашингтондан бундай хато ҳаракатларни тўғирлаш ва ХХР, жумладан, Гонконгнинг ички сиёсатига аралашмасликни сўраган.
«Хитой давлат суверенитети, миллий хавфсизлик ва мамлакат тараққиётини ҳимоя қилади. Давлатдаги «бир мамлакат, икки тизим» тамойилини амалга ошириш давом этади ҳамда ҳар қандай ташқи кучларнинг Гонконг ишига аралашувига йўл қўйилмайди», — дейди амалдор.
«Биз АҚШдан вазиятнинг жиддий эканини тушуниш, хатоларни тузатиш, қонунни имзолаш жараёнини тўхтатиш, Гонконг ва Хитойнинг ички ишларига аралашмаслигини сўраймиз, акс ҳолда ушбу ҳаракатлар оқибати учун масъулият Вашингтон зиммасида қолади», — дейилган баёнотда.
Мавзуга доир:
Изоҳ (0)