«Ўзбекконцерт» раҳбари: Лола 2018 йилдан бери лицензиясиз, клипи эса телевидениедаги бадиий кенгашларга қаратилган бўлса керак

Хонанда Лола Йўлдошева 2018 йил августидан бери лицензиясиз хонандалик фаолияти билан шуғулланиб келмоқда. Бу ҳақда «Ўзбекконцерт» давлат муассасаси раҳбари Одил Абдуқаҳҳоров 27 ноябрь куни журналистлар билан бўлиб ўтган очиқ мулоқотда маълум қилди.

Тадбирда «Дарё» мухбири Мусулмонбек Иброҳимов Ўзбекистон маданият вазирига Лоланинг «Севгингни менга айт 2» клипи юзасидан савол билан мурожаат қилган эди (вазир клип унга ёқмаганини тан олди). Шундан сўнг янграган қўшимча савол юзасидан «Ўзбекконцерт» раҳбари изоҳ берди.

Лола фуқаро сифатида клип чиқарди, десак ҳам бўлади. Қонуний жиҳатдан кўрадиган бўлсак, Лоланинг лицензияси 2018 йил 29 августда тугаган. У бундан кейин лицензия олиб фаолият юритмаяпти. Агар кўрган бўлсангиз, эртасига Instagram’даги саҳифасида шарҳ қолдириб, «клипда беш йил олдинги ҳолат бўйича маълумот бердим», деб айтган.

«Ўзбекконцерт» давлат муассасаси томонидан клиплар Лоланинг клипида кўрсатилганидек қабул қилинмайди. «Ўзбекконцерт»да бундан икки йил аввал клиплар бўйича бадиий кенгаш бор эди, лекин ҳозир у фаолият юритмаяпти. «Ўзбекконцерт» томонидан клипга қараб ҳеч қачон лицензия берилмаган ва берилмайди ҳам.

Кўпчилик буни ҳар хил талқин қилиши мумкин, лекин Лоланинг клипи телевидениелардаги бадиий кенгашлар фаолиятига қаратилган, деб ўйлайман.

Одил Абдуқаҳҳоров, «Ўзбекконцерт» раҳбари

Кўп ўтмай Ўзбекистон Хотин-қизлар қўмитаси раиси Элмира Боситхонова Лолани «атласни масхарабоз кийими, маънавият сўзини ўйинчоқ қилиш»да, Лоланинг ўзи эса оммавий ахборот воситаларини клипнинг «моҳияти ва мазмунини ўзгартириб, ўз манфаати йўлида фойдаланишга қарор қилган»ликларида айблаб чиққан эди.