2020 йил 1 январдан Тошкентдаги жамоат транспортига йўл ҳақи тўлашнинг автоматлаштирилган тизими босқичма-босқич жорий этилади. Тизим доирасида жамоат транспорти учун ягона транспорт карталари, тўловни амалга ошириш имконини берадиган мобиль илова ҳамда бир марталик QR чипталар жорий этилади. Бу ҳақда «Kun.uz» хабар бермоқда.
Қайд этилишича, Ахборот ва оммавий коммуникациялар агентлигида бўлиб ўтган матбуот анжуманида Транспорт вазирлиги автомобиль ва дарё транспортини ривожлантириш департаменти бошлиғи Руслан Рўзиметов транспорт карталарини савдо нуқталари, метрополитен, автовокзал, темир йўл кассалари ва аэропортлардан сотиб олиш мумкинлигини маълум қилган.
Маълум бўлишича, ягона транспорт карталарининг нархи 8—9 минг сўм атрофида бўлиб, уни узоқ вақт давомида ишлатиш мумкин. Карталар ҳисобини банк пластик карталаридаги маблағлар, банкоматлар, киосклар, терминаллар ҳамда мобиль иловалар орқали тўлдириш мумкин. Йўловчи ой давомида сарфлаши мумкин бўлган тахминий миқдордаги пулни олдиндан ёки ҳар куни кундалик харажатни тўлаб бориши мумкин.
Жорий этилаётган автоматлаштирилган тизимда йўл ҳақи учун тўловларни контактсиз банк карталари, жумладан, Humo, Uzcard, Visa, Mastercard ва бошқалар орқали ҳам тўлаш имконияти яратилади.
Автоматлаштирилган тизим Тошкент шаҳрида «Тошшаҳартрансхизмат» АЖ ва «Тошкент метрополитени» УКнинг айрим йўналишларида кўрсатилган йўловчи ташиш хизматлари учун 2020 йил 1 январдан жорий этилиши режалаштирилган.
Нукус шаҳри ва вилоят марказларида йўловчи ташиш хизматлари учун мазкур тизим 2020 йил 1 августдан ишлаши кўзда тутилган.
Республиканинг бошқа ҳудудларида эса 2021 йил 1 январдан бошлаб автоматлашган тизим жорий этилиши кутилмоқда.
Изоҳ (0)