Футбол бўйича Европанинг энг нуфузли мусобақаси бўлмиш Чемпионлар Лигаси гуруҳ босқичи баҳслари ҳам якунига етиш арафасида. 26 ноябрь, сешанба оқшомида 5-турнинг марказий баҳсларидан бир Мадридда бўлиб ўтади. Миллионлаб мухлисларниниг нигоҳи Испания пойтахтидаги баҳсга қаратилган: «Реал» араб шайхлари оталиқидаги ПСЖга қарши.
Гуруҳ босқичига қуръа ташланган вақтда «А» гуруҳининг сўзсиз фаворитлари сифатида «Реал» ва ПСЖ қайд этилганди. Бироқ биринчи тур ўтибоқ асосий фаворит ПСЖ эканлиги ойдинлашиб қолди. Боиси ПСЖ ўз майдонида асосий футболчиларсиз (Кавани, Мбаппе ва Неймарсиз) «Реал» ортиқча қийинчиликларсиз мағлуб этишнинг уддасидан чиқди — 3:0. Иккинчи турда ҳам ПСЖнинг яққол фаворит эканлиги янада аниқ бўлди. Мадрид клуби ўз майдонида «Брюгге»ни мағлуб эта олмади. ПСЖ эса сафарда «Галатасарой» мағлуб этди.
5-турга келиб гуруҳдаги ҳолат шундай: ПСЖ тўртта ўйиннинг барчасида ғалаба қозонди. Тўплар нисбати эса шунчаки ажойиб — 10:0. «Реал» эса дастлабки икки турдаги йўқотишлардан сўнг «Галатасарой»ни сафар ва уйда ҳам мағлуб этди. Очколари сонини эса еттитага етказиб олди.
Бугунги баҳс фаворити ҳақида
Юқорида ПСЖнинг фаворит эканлигини тилга олдик. Шу ерда қаерда фаворит эканлигига аниқлик киритиб ўтсак. Парижликлар «А» гуруҳида фаворит. Ҳозирча ундан ортиғи эмас. Нега дерсиз? ПСЖ сўнгги йилларда гуруҳ босқичдан ҳеч қандай қийинчиликларсиз ўтмоқда. Аммо плей-офф босқичи ҳақида бундай деб бўлмайди. Томас Тухель жамоаси Франция чемпионатида ҳам пешқадам, бироқ Чемпионлар Лигасидан фарқли ўлароқ ички биринчиликда учта ўйинда мағлубият аламини тотиб кўришга улгурди.«Реал» бўлса, ПСЖдан учралган мағлубиятдан сўнг секин-секин бўлса-да ўзига келиб олди. «Галатасарой»га олтита гол урилди. Испания чемпионатида эса «Барселона» билан бирга пешқадамликни давом эттирмоқда. Ўйин Мадридда ўтиши ва «Реал» футболчиларининг сўнгги ўйинларда яхши спорт формасига кириб олгани ҳисобга олинса, бугун Париждаги каби ПСЖ осонлик билан ғалаба қозона олмаслиги аниқ.
Шулардан ва бошқа тилга олинмаган омиллардан келиб чиқилса, имкониятлар 50=50.Таркиблар ҳақида
Таркиб ҳақида гапирадиган бўлсак, Неймар жароҳатини даъволаш билан банд бўлган вақтда ПСЖ жонига аргентиналиклар оро кирди. Анхель ди Мария ва Мауро Икарди шунчалик қойилмақом ўйин кўрсатмоқдаки, худди Неймар жамоага ортиқчадек. Бироқ Неймардек футболчи ҳар қандай жамоа учун фойда келтира олади. Балки бугун шундай бўлар. Аммо Икардининг ишончли ўйини Эдинсон Каванидек тўпурарни захирага михлагани ҳам ҳақиқат. Камига биринчи турда иштирок этмаган 20 ёшли вундеркинд — Килиан Мбаппе ҳам бу сафарги баҳсга тайёр. Ҳар ҳолда Зидан Мбаппенинг «ўйинини севиши» ҳақида гапириб турган вақтда Килиан бундай имкониятни қўлдан бой бермаса керак. Парижликларнинг дарвоза чизиғидан кўнгли буткул тўқ. «Реал»га керак бўлмай қолган Кейлор Навас ПСЖнинг ҳақиқий устунига айлана олди. Бунга унинг гуруҳ босқичидаги ўйинларда битта ҳам гол ўтказмагани яққол далил, албатта. Хуллас, Тухель олдида ҳам қийин вазифа бор. Боиси унда танлов имконияти жуда кенг. Қайсидир мегаюлдуз бугунги ўйинни захирадан бошлашга мажбур.
«Реал»га келсак, Мадрид клубида айни дамда катта муаммолар деярли йўқ. Тўғри, Марко Асенсио ҳамда Хамес Родригес жароҳатини даъволатиш билан банд. Гарет Бэйлнинг ўзини тутишидан мухлислар норози. Иско ҳамон Зидан кутаётган формага кириб улгурмади. Аммо «Қироллик клуби»дан уларнинг ўрнини билдирмаётган ўйинчиларнинг борлигини ҳам унутмаслик лозим. Жумладан, Бэйлнинг бемалол голф ўйнашига имконият яратиб бераётган 18 ёшли Родригони тилга олмаслик, инсофсизлик бўлади. Бразилиялик ўзига берилаётган имкониятдан максимал даражада фойдаланмоқда. Ўтган йили жамоага олиб келинган яна бир бразилиялик вундеркинд Винисиус Жуниордан фарқли ўлароқ Родриго шу қадар совуққонлик билан ҳаракат қилмоқдаки, у ҳатто ҳет-трик қилишга ҳам улгурди. Яна камига Чемпионлар Лигасида. Бир гап билан айтганда ва эчки халақит бермаса, бўладиган бола. Мавсум аввалида не-не умидлар ила катта маблағ эвазига жамоага олиб келинган Бельгия терма жамоаси сардори Эден Азар ҳам секин-аста ўзининг оптимал формасига кириб бормоқда. Буни унинг «Реал Сосьедад»га қарши баҳсдаги ҳаракатлари ҳам исботлаб турибди. У рақибларини 10 марта алдаб ўтишга муваффақ бўлди. Тўғри, у гол урмади. Бироқ жамоадошларининг бўш ҳудуд бўйлаб ҳужумга ўтиши, гол уриши учун энг катта ҳисса қўшаётган футболчилардан бирига айланиб улгургани ҳам рост. Марказда «Реал»нинг тўпсиз фойдали ҳаракатларини таъминлашда уругвайлик Федерико Вальверденинг ўрни беқиёс. Зидан «Реал»ни илк бор бошқарувга олган вақтида Каземиро ҳақиқий топилма бўлганди. Энди эса Феде. Шундай экан марказдан ҳам мухлислар хавотир олмаса бўлади. Ваниҳоят дарвоза чизиғи ҳақида. Тибо Куртуа ҳам ўзига бўлган ишончни тиклашга ҳаракат қилди ва қайсидир маънода бунинг уддасидан чиқди. Куртуа ҳатто Кейлор Навас томонидан ўрнатилган рекордни янгилади. Навас вақтида 517 дақиқа давомида ўз дарвозаси дахлсизлигини таъмилаган бўлса, Тибо буни 534 дақиқага етказди. Унинг ишончли ҳаракатлар сабаб «Реал» Ла Лигада энг кам гол ўтказган жамоалар орасида иккинчи бўлиб турибди.
Тахминий таркиблар
«Реал»: Куртуа — Карвахаль, Рамос, Варан, Марсело — Каземиро, Вальверде, Кроос — Азар, Родриго, Бензема
ПСЖ: Навас — Сильва, Кимпембе, Дагба, Бернат — Маркиньос, Гуйе, Сарабия — Ди Мария, Икарди, Мбаппе
Мураббийлар ўйиндан олдин
ПСЖга қарши баҳс ҳаммамиз учун муҳим. Бэйл учун ҳам, бизга ҳам мухлисларга ҳам. Яхши ўйин ўтказишга мажбурмиз. ПСЖ яхши мавсум ўтказмоқда. Шундай экан, ўзимизга бўлган талаб ҳозиргача бўлганларидан юқори бўлади. Аммо бу бизга ёқмоқда.Зинедин Зидан, «Реал» бош мураббийи
Бу баҳс биринчи даврадагисидан бошқача бўлади. «Сантьяго Бернабеу»да ўйнаш қийин. «Реал» ҳозир жуда яхши формада. Улар жуда кўп гол уриб, кам гол ўтказиб юбормоқда. Аммо бизда ҳам барқарор жамоа бор. Бу чақирувга тайёрлигимиз аниқ.Томас Тухель, ПСЖ бош мураббийи
ЕЧЛ5-тур баҳси26 ноябрь, сешанба
Изоҳ (0)