Тошкент шаҳар ҳокимлигида Олий Мажлис Қонунчилик палатаси, халқ депутатлари Тошкент шаҳар ва туман кенгашларига бўлиб ўтадиган сайловларга тайёргарлик кўриш ва уни ўтказишга доир ташкилий масалалар кўриб чиқилди. Бу ҳақда ҳокимлик матбуот хизмати маълум қилди.
Йиғилишда сўзга чиққан Тошкент шаҳар ҳокимининг ўринбосари Элбек Шукуровнинг қайд этишича, сайловга тайёргарлиги ҳолатини ўрганиш мақсадида 272 нафар турли соҳа вакилларидан иборат ишчи гуруҳ тузилди. Ушбу ишчи гуруҳ вакиллари томонидан 14—15 ноябрь кунлари пойтахтда ташкил этилган 893 та участка сайлов комиссияси фаолияти ўрганиб чиқилди.
Ўрганиш натижаларига кўра, бугунги кунда Тошкент шаҳрида сайловга тайёргарликда айрим камчиликлар кузатилмоқда.
Йиғилишда бўлажак сайловларга тайёргарлик юзасидан қатор масалалар кўриб чиқилди ва барча масъулларга ўрганиш давомида аниқланган камчиликларни тез фурсатларда бартараф этиш, хусусан, сайлов участкаларини талаб даражасида жиҳозлаш, уларда интернет узлуксиз ишлашини таъминлаш ҳамда 5 кун муддатда сайловчиларнинг электрон рўйхатини тўлиқ шакллантириш топшириғи берилди.Сайловларга тайёргарлик масаласида камчиликка йўл қўйган мутасаддиларга тегишли тартибда чоралар кўрилди.
Изоҳ (0)