Тошкент давлат иқтисодиёт университетида 25 ноябрдан бошлаб ўқиш ҳафтаси беш кунлик этиб белгилангани ҳақида хабар берилган эди. Университет ахборот хизмати мазкур хабарга изоҳ берди.
Университет томонидан маълум қилинишича, таълим муассасасида 2019 йил 25 ноябрдан бошлаб беш кунлик таълим тизимига ўтиш белгиланган. Бунда талабалар ҳафтанинг беш куни давомида назарий билимларни олади, ҳафтанинг шанба кунида мустақил таълим билан шуғулланади.
Университет ахборот хизмати «Халқ сўзи» томонидан берилган маълумот нотўғри талқин этилганини таъкидламоқда. Маълум қилинишича, университетда фақат якшанба дам олиш куни ҳисобланади, шанба эса мустақил таълим куни этиб белгиланган.
ТДИУ томонидан маълум қилинишича, талабаларнинг кийиниши бўйича эркинлик берилган, аммо университет жамоатчилик кенгаши ва талабалар томонидан маъқулланган ички тартиб-қоидаларига риоя қилиниши зарурлиги белгилаб қўйилган. «Албатта, бунда талабалик одобига риоя қилган, таълим даргоҳи — маданият ўчоғи эканлигини ёддан чиқармаган ҳолда кийиниш тавсия этилмоқда», — дейилади университет хабарида.
Қайд этилишича, бу «Халқ сўзи» таъкидлаганидек, университет талабаси исталган кийимда ўқишга келиши ва дарсларда иштирок этиши мумкин, дегани эмас.
Изоҳ (0)