Олий Мажлис Қонунчилик палатасининг 21 ноябрь, пайшанба куни бўлиб ўтган мажлисида депутат Расул Кушербаев умумий ўрта таълим муассасаларини оптик толали интернет алоқа воситалари билан таъминлаш ҳолатига тўхталиб ўтди. Бу ҳақда «Дарё»га Қонунчилик палатаси матбуот хизмати хабар берди.
Депутат 2020 йилга мўлжалланган Давлат бюджетида Ўзбекистондаги умумий ўрта таълим муассасаларини оптик толали интернет алоқа воситалари билан тўлиқ таъминлаш масаласини акс эттириш таклифи билан чиққан. «Бу, ўз навбатида, жойлардаги инфратузилманинг ривожланишига, аҳолининг ахборот технологиялари бўйича саводхонлик даражасининг ошишига хизмат қилади», — деган Расул Кушербаев.
«‘Ўзбектелеком’ акциядорлик компанияси билан биргаликда 3 йиллик чора-тадбирлари режасини ишлаб чиққанмиз. Унда мамлакатимизда 10 мингта таълим муассасасини босқичма-босқич интернет алоқа воситалари билан таъминлаш масаласи ўз аксини топган. Хусусан, 2019 йилда 4 152 та, 2020 йилда 4 367 та, 2021 йилда 1 600 та таълим муассасасини тўлиқ оптик толали алоқа линиялари билан таъминлаш кўзда тутилган. Бу масала бўйича маблағдан муаммо йўқ, — деб айтган Халқ таълим вазирлиги масъул ходими Темур Комилов.
Қайд этилишича, мазкур масала мажлисда атрофлича муҳокама қилиниб, 2020 йил мамлакатдаги барча мактаблар оптик толали интернет алоқа воситалари билан таъминланадиган бўлди.
Изоҳ (0)