Шарғун шаҳрини 2020—2022 йилларда комплекс ривожлантириш режалаштирилмоқда

Сурхондарё вилоятининг республика бўйсунувидаги Шарғун шаҳрини 2020—2022 йилларда комплекс ижтимоий-иқтисодий ривожлантириш режалаштирилмоқда. Бу ҳақдаги Вазирлар Маҳкамасининг қарори Қонун ҳужжатлари муҳокамаси порталига жойлаштирилди.

Қарор лойиҳасига мувофиқ, Шарғун шаҳрида 2020—2022 йилларда бажариладиган асосий тадбирлар сифатида қуйидагилар белгиланган:

Биринчидан, Шарғун шаҳрининг Бош режасини танқидий ўрганиб, йўл-транспорт инфратузилмаси, шоҳ кўчалар, кўп қаватли уйлар қурилиши, парклар, булварлар, замонавий савдо марказлари, инфратузилма объектлари ва саноат зоналарини жойлаштириш масалаларини муҳандислик тармоқлари билан биргаликда кўриб чиқиб, таклифларни тайёрлаш ҳамда яқин 3—5 йиллик шаҳарсозлик вазифаларини белгилаб олиш;

• архитектуравий қиёфани замонавийлаштириш, кўп қаватли уй-жой фондини сифат жиҳатдан яхшилаш, коммунал хизмат кўрсатиш тизимини тубдан такомиллаштириш, аҳолига сифатли коммунал хизмат кўрсатишни жорий этиш;
• муҳандислик-коммуникация тармоқлари, хусусан ичимлик суви ва оқова сув тизимларини қайтадан қуриш, автомобиль йўллари ва ички кўчалар ҳолатини яхшилаш, шаҳар кўчаларидаги мавзеларда тунги ёритиш тизимларини янгидан замонавий ҳолатга келтириш;
• ички ва шаҳарлараро йўналишларда ҳаракатланувчи жамоат транспортларининг янги йўналишларини ташкил этиб, аҳолига сифатли ва қулай транспорт хизматларини кўрсатишни ташкил этиш;
• транспорт хизматларини кўрсатувчи янги хусусий корхоналар ташкил этиб, уларни молиявий қўллаб-қувватлаш орқали замонавий жамоат транспорт воситаларини харид қилиш;

Иккинчидан, шаҳарда экологик муҳитни яхшилаш, аҳоли саломатлигига салбий таъсирини камайтириш чораларини кўриш, кўкаламзорлаштириш, дарахтларни ўтқазиш ва яшил майдонлар, гулзорлар ташкил этиш тадбирларини амалга ошириш;

• бунда, мазкур тадбирларни амалга ошириш учун шаҳарда очиқ ва ёпиқ ер ости суғориш тизимларини барпо этиб, ирригация тармоқларини бугунги кун талабида қайта тиклаш;

Учинчидан, ижтимоий соҳа муассасалари ҳолатини яхшилаш, биноларини таъмирлаш, ҳудудларини ободонлаштириш, жиҳозларини янгилаш, мутахассисларнинг малакасини ва хизмат маданиятини ошириш орқали кўрсатиладиган хизматлар сифатини кескин ошириб, бу соҳада хусусий сектор улушини кўпайтириш;

• замонавий тиббий хизмат кўрсатиш клиникалари ва ташхис марказларини барпо этиш;
• хотин-қизларни турли касбларга ўргатиш ҳамда қизларни ҳаёт мактабига тайёрлашга ихтисослашган ўқув марказлари фаолиятини кенг йўлга қўйиш;

Тўртинчидан, аҳолининг маънавияти ва маданиятини ўстириш билан алоқадор тизимли тадбирларни амалга ошириш, хусусан қаровсиз қолган ва зарур даражада фойдаланилмай турган маданият ва санъат саройларини янгидан таъмирлаб, соҳа учун зарур бўлган жиҳозлар билан таъминлаш;

Бешинчидан, ўсиб келаётган ёшларни спортга кенг жалб этиш учун давлат умумтаълим мактабларида самарасиз фойдаланилаётган спорт майдонларида, спорт залларида давлат шерикчилик ва бошқа асосларда ташаббускорлар, Ёшлар иттифоқи, Жисмоний тарбия ва спорт вазирлиги билан ҳамкорликда ёшларни, шунингдек, ўрта ёшдаги аҳолини спортга жалб этиш;

Олтинчидан, шаҳар ичидан оқиб ўтувчи сув бўйи ҳудудларини ободонлаштириш, аҳоли кўнгилочар масканларини, сайилгоҳларни барпо этиш;

• кўп қаватли уйлар орасида сунъий қопламали футбол, баскетбол майдонлари ва майдончалари, болалар майдончалари барпо этиш ҳамда дам олиш, ҳордиқ чиқариш ўриндиқларини ўрнатиш;

Еттинчидан, аҳолининг маданий ҳордиқ чиқариши учун замонавий парклар барпо этиб, уларда замонавий кўнгилочар хизмат кўрсатиш турлари ташкил этиш;

Саккизинчидан, аҳолининг иш билан бандлигини ошириш ҳамда ишсизлик даражасини кейинги 3 йилда 5 фоиз даражагача пасайтириш мақсадида тадбиркорларни жалб этган ҳолда саноат ва хизмат кўрсатиш соҳаларини, қишлоқ хўжалиги маҳсулотларини қайта ишлаш тармоғини жадал ривожлантириш;

• саноат тармоқларини ривожлантириш учун тўғридан-тўғри хорижий инвестицияларни жалб этиш ҳажмини кескин ошириш, маҳаллий хом ашёдан экспортбоп маҳсулот ишлаб чиқаришни йўлга қўйиш орқали шаҳар иқтисодиётига валюта тушумини кўпайтириш борасида самарали ишларни ташкил этиш;
• мавжуд кичик саноат зоналари иштирокчилари фаолиятини қўллаб-қувватлаб, янги ҳудудларда истиқболли лойиҳаларни жойлаштириш йўли билан саноат зоналарини ташкил этиш;

Тўққизинчидан, солиққа тортиш базасини кенгайтириш орқали маҳаллий бюджетга даромадлар тушумини кескин ошириш.

Шарғун шаҳрини 2020—2022 йилларда комплекс ижтимоий-иқтисодий ривожлантириш чора-тадбирлари дастурини тасдиқлаш ҳам режалаштирилмоқда.

Қарор лойиҳасига кўра, Шарғун шаҳрида 15 та арзон 5 қаватли кўп квартирали уй қуриш ҳам кўзда тутилган.

Шунингдек, шаҳарда ривожланган давлатлар тажрибалари асосида хорижий инвесторларни жалб этган ҳолда замонавий истироҳат боғи барпо этиш ҳам режалаштирилган.