Эфиопия бош вазири Абий Аҳмад Али Франция президенти Эммануэл Макрондан мамлакат ҳарбий ҳаво кучларини кучайтириш учун янги ҳарбий қуроллар, жумладан, ядро ракеталари беришни сўраган. Бу ҳақда Daily News Egypt хабар қилди.
Хабарга кўра, Абийнинг мактуби Франция давлат раҳбарига июль ойида йўлланган. Сўралган қурол-яроғлар рўйхатига 12 та қирувчи самолёт (Rafale вa Mirage 2000), 18 та вертолёт, Airbus томонидан ишлаб чиқарилган иккита ҳарбий-транспорт самолёти, 10 та Dassault дрони, радиоэлектрон босқин тизими ва 30 га яқин М51 ядровий баллистик ракеталари киритилган.
Нашрнинг қайд этишича, Эфиопия бош вазирининг Франция ҳукуматидан ядро қуроллари сўраб қилган ушбу илтимос мактуби ноқонуний ҳаракат ҳисобланади. Иккала давлат ҳам ядро қуролини тарқатмаслик ҳақидаги халқаро келишувга аъзо бўлган.
Ядро қуролини тарқатмаслик бўйича келишув БМТ экспертлари томонидан тайёрланган ва 1970 йилда кучга кирган. Ушбу халқаро шартномага 190 та мамлакат аъзо ҳисобланади.
Октябрь ойида Миср президенти Абдул Фаттоҳ ас-Сиси ва Эфиопия ҳукумати раҳбари Абий Аҳмад Али Россиянинг Сочи шаҳридаги учрашувда Нил дарёси бўйида қурилаётган «Қайта туғилиш» тўғони қурилишини қайта бошлаш бўйича келишувга эришган.
Изоҳ (0)