«Ўзбеккино» Миллий агентлиги буюртмаси асосида суратга олинган фильмларнинг премьера куни маълум бўлди. Бу ҳақда «Ўзбеккино» матбуот хизмати журналист Феруз Муҳаммадга маълум қилди.
«Биринчи август» фильми
Режиссёр Абдувоҳид Ғаниев томонидан суратга олинган «Биринчи август» фильмининг премьераси 26 ноябрь куни бўлиб ўтади. ‘Биринчи август’ фильми 2009—2010 йилларда авж олган коррупция, яъни университетга кириш имтиҳонлари қаллобликларига бағишланади.
Бош ролларни Йигитали Мамажонов, Райҳон Уласенова, Феруза Юсупова, Муяссар Бердиқулова, Собир Отажонов сингари актёр ва актрисалар ижро этган.
«Авлоний» тарихий фильми
Режиссёр Музаффар Эркинов томонидан суратга олинган «Авлоний» тарихий фильмининг премьераси 6 декабрь куни бўлиб ўтади. Картинада Абдулла Авлонийнинг 1919 йилда Афғонистонга қилган дипломатик сафари ҳақида ҳикоя қилинади.
Фильм воқеаларига Тоҳир Маликнинг «Қалдирғоч» асари мотиви асос қилиб олинган. Киноасарда Абдулла Авлоний роли Хоразм театри актёри Алишер Йўлдошевга ишониб топширилди.
Фильмда Ўзбекистон халқ артисти Муҳаммадали Абдуқундузов, Ўзбекистонда хизмат кўрсатган артист Матёқуб Матчонов ҳамда Аброр Йўлдошев, Жавоҳир Зокиров сингари актёрларни ҳам кўришингиз мумкин.
«Қўқон шамоли» тарихий фильми
Режиссёр Дилмурод Масаидов, продюсер Маҳмуд Эркабаевлар томонидан суратга олинган «Қўқон шамоли» тарихий фильмининг премьераси 20 декабрь куни бўлиб ўтади. Фильм Қўқон хонлигининг XVIII аср охири — XIX аср бошларидаги ижтимоий-сиёсий ҳамда адабий муҳити, ўша давр чигалликлари ҳақида бўлиб, асосан, Қўқон хони Умархон ҳамда шоира Нодирабегим ҳаётидан ҳикоя қилади.
Бош ролларни Илҳом Бердиев, Райҳон Асатова, Бобур Йўлдошев, Гулбаҳор Йўлдошева, Фурқат Файзиев сингари актёр ва актрисалар ижро этган.
Изоҳ (0)