Аҳад Қаюм ўғри шоирми? Бобур Бобомурод Аҳад Қаюм ҳақида тарқалган гап-сўзларга муносабат билдирди (видео)

Ўзбекистонда хизмат кўрсатган маданият ходими, шоир Бобур Бобомурод «Дарё» интернет-нашри учун эксклюзив интервью берди. Интервьюни журналист Феруз Муҳаммад ташкиллаштирди.

«Синишимни соғинди кимлар?», «Ман яна ман», «Яна соғиндим, яна», «Жийда гуллари», «Йиғлама, ўзимнинг фариштагинам» каби кўплаб хит қўшиқлар муаллифи бўлган Аҳад Қаюм ҳақида «шеърларни ўзи ёзмайди», «ўғри шоир» мазмунидаги гап-сўзлар тарқалган.

Бобур Бобомурод суҳбат давомида шогирди Аҳад Қаюм ҳақида тарқалган хабарларга муносабат билдирди.

https://youtu.be/2IkjAOeyBRM?t=1h3m28s

Мен шу йигитга қойил қолганман. У менинг олдимга шоир бўламан деб келмаган. Қўшиқ айтаман деб келган. Қўшиқ унча ўхшамади. Кейин актёр бўламан деб ўзини синаб кўрди. Ўша пайтда актёрлик, киноларда рол ўйнаш қийин эди. Ўшанда машҳур бир хонандани офисида ишлаб турганда, ‘сен келган шеърларни йиғиб тур, компьютерга ёзиб тургин, сенга иш шу’, деганман.

Хонандаларга жуда кўп шеър келади, мен ўзим ҳам гувоҳи бўлганман. Кимдир дафтарда, кимдир қоғозда, яна кимдир китобда хонандага шеър юборади. У шеърлар хонанданинг эсидан ҳам чиқиб кетади. Ким ёзганини, нима ёзганини билмайди, чунки кўпчилик хонандалар китоб ўқимайди. Студияга боради-да, тайёр матнни айтиб бериб, фонограммага тушиб кетаверади. Уни ёдлаб ҳам ўтирмайди. Кўпчилиги шу, лекин шеърнинг маъносини кўндалангига ҳам, бўйига ҳам, энига ҳам кўрадиган ҳофизлар ҳам бор. Бу алоҳида мавзу. Лекин ҳозир Аҳад ҳақида гапирадиган бўлсак, ўша пайтда у ёшлигига бориб, ҳақиқатан ҳам қизиқиб бир-иккита шеърларнинг бандига ўзгартириш киритган. Барибир меҳнат қилган. Тўрт бандни у ёқдан олиб, саккиз бандни ўзи қўшган.

‘Шеърларни тўғирлаб беринг’, деб менга ҳам олиб келишади, лекин мен тўғирлаб берган шеърларимга ҳеч қачон ўз номимни қўймаганман. Қўйишга ор қиламан. Кейин мен Аҳадга айтдим, ‘Яхшими, ёмонми номинг чиқди. Аҳад Қаюм бўлдинг, энди ука, китобларни олгин-да, ўқигин. Яхши база бўлса, ўзингни ҳам қўлинг келишиб қолди’, дедим. Кейин у менга ‘бир-икки йил вақт беринг’, деди.

Аҳад китобларни ўқиб, анча қалами ҳам келишиб қолди. Ўз устида ишлай бошлади. Лекин ўзи ҳам шоирликка даъво қилмайди, ‘мен актёрман’, дейди. Ҳозир ҳам ўз устида ишласа, у йигитда қобилиятни сезаман.

Балки, у ўшанда машҳур бўлиш учун, ўзини топиш учун шундай ҳаракат қилгандир. Мен уни кечираман, балки уни шеър эгалари кечирмас. Лекин меҳнат қилганини барибир тан олиш керак. Ўзимга ҳам шеърларимдан таъсирланиб ёзганини айтган. ‘Шу йигит фойдалансин’, деб ўшанда ярим рухсат бериб қўйганман. ‘Лекин ўзингни тезроқ йиғиштириб олгин, бўлмаса балога қолиб кетасан’, деганман. Чунки бизда шунақа, бир кишини ёмон кўрсак, уни охиригача у-бу нарса қилиб, эзиб ташламагунимизча қўймаймиз. Ҳолбуки, унга сал имконият бермаймиз.

Мен ҳакам эмасман, уни тўғри ҳам демайман, чунки бу нарса одамзотнинг ўзига, иймонига, савиясига ҳавола. Шуни ўзига эп кўрдими, шунга яраша жавоб олади.

Бобур Бобомурод, Ўзбекистонда хизмат кўрсатган маданият ходими