Жиззах вилояти халқ таълими бошқармаси Шароф Рашидов тумани халқ таълими бўлимига қарашли 21-сонли умумий ўрта таълим мактаби тўғрисида ижтимоий тармоқларда берилган видеолавҳа юзасидан расмий маълумот берди.
Жиззах вилояти халқ таълими бошқармасининг 18 ноябрдаги 173-сонли буйруғи билан тезкор ишчи гуруҳи тузилиб, бугунги кунда Шароф Рашидов тумани халқ таълими бўлимига қарашли 21-сонли умумий ўрта таълим мактабида хизмат текшируви ишлари олиб борилмоқда.
21-сонли мактабнинг 8-«в» синф раҳбари Зият Пардаев 22 октябрь куни ўзи раҳбарлик қилаётган синф ўқувчилари Умурзоқ Назарқулов, Оғабек Равшанов ҳамда Шерали Ишпўлатовни сабабсиз дарсга қатнашмасдан кўчада юрганлигини аниқлаган. Шундан сўнг, синф раҳбари Зият Пардаев ўқувчиларни машинасида кўчадан олиб келган ҳамда синфга олиб кириб педагогларга хос бўлмаган хатти-ҳаракатлар билан жазолаган.
Мактабнинг 8-«в» синф ўқувчиларнинг 2019—2020-ўқув йили 1-чораги давомати ўрганилганда, синф раҳбари томонидан жазоланган ўқувчилар мунтазам равишда дарс машғулотларига кечикиб келишлари ва сабабсиз дарс қолдиришлари маълум бўлган. Ижтимоий тармоқда тарқатилган видеолавҳа бўйича мактаб жамоаси, ота-оналар қўмитаси, кузатув кенгаши аъзолари ҳамда ўқитувчилар билан кенгайтирилган йиғилиш ўтказилиб, тушунтириш ишлари олиб борилди.
«Ушбу ҳолат юзасидан Шароф Рашидов тумани ички ишлар бўлими ҳамда туман прокуратураси ходимлари томонидан ўрганиш ишлари олиб борилмоқда. Ўрганиш натижалари бўйича қўшимча маълумот тақдим этилади», — дейилади хабарда.
Аввалроқ Фарғонада дарсга кеч қолган ўқувчилар мактабга киритилмаётгани ҳақидаги видеони тарқатган фуқаро узр сўрагани ҳақида хабар берилганди.
Изоҳ (0)