O‘zbekistonda xizmat ko‘rsatgan madaniyat xodimi, shoir Bobur Bobomurod “Daryo” internet-nashri uchun eksklyuziv intervyu berdi. Intervyuni jurnalist Feruz Muhammad tashkillashtirdi.
“Sinishimni sog‘indi kimlar?”, “Man yana man”, “Yana sog‘indim, yana”, “Jiyda gullari”, “Yig‘lama, o‘zimning farishtaginam” kabi ko‘plab xit qo‘shiqlar muallifi bo‘lgan Ahad Qayum haqida “she’rlarni o‘zi yozmaydi”, “o‘g‘ri shoir” mazmunidagi gap-so‘zlar tarqalgan.
Bobur Bobomurod suhbat davomida shogirdi Ahad Qayum haqida tarqalgan xabarlarga munosabat bildirdi.
https://youtu.be/2IkjAOeyBRM?t=1h3m28s
Men shu yigitga qoyil qolganman. U mening oldimga shoir bo‘laman deb kelmagan. Qo‘shiq aytaman deb kelgan. Qo‘shiq uncha o‘xshamadi. Keyin aktyor bo‘laman deb o‘zini sinab ko‘rdi. O‘sha paytda aktyorlik, kinolarda rol o‘ynash qiyin edi. O‘shanda mashhur bir xonandani ofisida ishlab turganda, ‘sen kelgan she’rlarni yig‘ib tur, kompyuterga yozib turgin, senga ish shu’, deganman.Xonandalarga juda ko‘p she’r keladi, men o‘zim ham guvohi bo‘lganman. Kimdir daftarda, kimdir qog‘ozda, yana kimdir kitobda xonandaga she’r yuboradi. U she’rlar xonandaning esidan ham chiqib ketadi. Kim yozganini, nima yozganini bilmaydi, chunki ko‘pchilik xonandalar kitob o‘qimaydi. Studiyaga boradi-da, tayyor matnni aytib berib, fonogrammaga tushib ketaveradi. Uni yodlab ham o‘tirmaydi. Ko‘pchiligi shu, lekin she’rning ma’nosini ko‘ndalangiga ham, bo‘yiga ham, eniga ham ko‘radigan hofizlar ham bor. Bu alohida mavzu. Lekin hozir Ahad haqida gapiradigan bo‘lsak, o‘sha paytda u yoshligiga borib, haqiqatan ham qiziqib bir-ikkita she’rlarning bandiga o‘zgartirish kiritgan. Baribir mehnat qilgan. To‘rt bandni u yoqdan olib, sakkiz bandni o‘zi qo‘shgan.
‘She’rlarni to‘g‘irlab bering’, deb menga ham olib kelishadi, lekin men to‘g‘irlab bergan she’rlarimga hech qachon o‘z nomimni qo‘ymaganman. Qo‘yishga or qilaman. Keyin men Ahadga aytdim, ‘Yaxshimi, yomonmi noming chiqdi. Ahad Qayum bo‘lding, endi uka, kitoblarni olginda, o‘qigin. Yaxshi baza bo‘lsa, o‘zingni ham qo‘ling kelishib qoldi’, dedim. Keyin u menga ‘bir-ikki yil vaqt bering’, dedi.
Ahad kitoblarni o‘qib, ancha qalami ham kelishib qoldi. O‘z ustida ishlay boshladi. Lekin o‘zi ham shoirlikka da’vo qilmaydi, ‘men aktyorman’, deydi. Hozir ham o‘z ustida ishlasa, u yigitda qobiliyatni sezaman.
Balki, u o‘shanda mashhur bo‘lish uchun, o‘zini topish uchun shunday harakat qilgandir. Men uni kechiraman, balki uni she’r egalari kechirmas. Lekin mehnat qilganini baribir tan olish kerak. O‘zimga ham she’rlarimdan ta’sirlanib yozganini aytgan. ‘Shu yigit foydalansin’, deb o‘shanda yarim ruxsat berib qo‘yganman. ‘Lekin o‘zingni tezroq yig‘ishtirib olgin, bo‘lmasa baloga qolib ketasan’, deganman. Chunki bizda shunaqa, bir kishini yomon ko‘rsak, uni oxirigacha u-bu narsa qilib, ezib tashlamagunimizcha qo‘ymaymiz. Holbuki, unga sal imkoniyat bermaymiz.
Men hakam emasman, uni to‘g‘ri ham demayman, chunki bu narsa odamzotning o‘ziga, iymoniga, saviyasiga havola. Shuni o‘ziga ep ko‘rdimi, shunga yarasha javob oladi.
Bobur Bobomurod, O‘zbekistonda xizmat ko‘rsatgan madaniyat xodimi
Izoh (0)