Жаҳонгир Ортиқхўжаев ва журналистлар можароси
Якшанба Тошкент шаҳар ҳокими Жаҳонгир Ортиқхўжаевнинг овози ёзилган аудио муҳокамаси билан ўтди. «Адолат», ЎзХДП, ЎзЛиДеП ҳокимни қоралади, АОКА, Бош прокуратура ва Адлия вазирлиги ўрганиш олиб бораётганини маълум қилди, «Миллий тикланиш» шу ўрганишлардан кейин муносабат билдиришни маъқул деб топди, Журналистлар ижодий уюшмаси эса дастлабки уч партия каби муносабат билдирди. Бу орада ҳокимнинг бу қаҳрли сўзлари айнан кимларга қаратилгани маълум бўлди — «Kun.uz» журналистларига.
17 ноябрь оқшомида ҳоким «Kun.uz» жамоаси билан учрашган. Сайт баёнотига кўра, «томонлар ўзаро муросага келган, таҳририят ҳокимнинг ушбу вазият юзасидан билдирган мулоҳазаларини қониқарли деб топган». Шунингдек, «Kun.uz» жамоатчиликдан ушбу масалани ортиқ муҳокама қилмасликни сўраган, сабаби — бу низо турли сиёсий кучлар ва шахслар (кимлар?) томонидан «тор манфаатлар йўлида қурол сифатида фойдаланилиши» мумкин.
Ис газидан заҳарланганлар
Наманган вилоятининг Уйчи туманида 17 ноябрга ўтар кечаси бир оиланинг тўрт аъзоси ис газидан заҳарлаган. Ҳодиса оқибатида ота туман шифохонасига ётқизилган, она ва икки фарзанд эса воқеа жойида вафот этган. «Қўлбола ясалган иситиш печига пропан газ баллони резина шланг орқали уланиб уй ичида фойдаланилган, оқибатда эса ис гази ҳосил бўлган».10 ноябрь куни Нукусда эр-хотин ис газидан заҳарланиб ўлгани ҳақида хабар берилган эди; 11 ноябрь куни Риштонда вояга етмаган икки опа-сингил ҳаммомда ис газидан ҳалок бўлган эди; 15 ноябрь куни эса Жиззахнинг Дўстлик туманида бир оиланинг уч аъзоси ис газидан заҳарланган, оила бошлиғи воқеа жойида вафот этган эди. Ҳақиқий қаҳратонли кунлар эса ҳали олдинда...
Шоир Бобур Бобомуроднинг Андижон ҳокимига мурожаатига
«Ravon мингим келади, пахта тергим келади» деб ёзган шоирга Андижон вилояти ҳокими Nexia автомобили совға қилгани ҳақидаги хабар интернетда чакана шов-шув бўлгани йўқ. Шоир Шарофиддин Болтабоевнинг шеърига бошқа шоир — Бобур Бобомурод муносабат билдирди (батафсил — бу ерда). Қизиқ мулоҳазалар: «Ҳокимни ҳам тантилиги тутди, ‘Ravon’ нима бўлибди — Андижонда ‘Ravon’ чиқади, берворишибди. Майли, ҳамма шоирга берсин. Одамларга илтимос қиламан, бунақа ёмон, ғаразли гапларни айтманглар. Тасаввур қилинглар, Шарофиддин ака лотерея ўйнади, лотереяда шу машинани ютди. Омадини берсин, бизга ҳам насиб қилсин».Обеликс — Хивада
Ўзбекистоннинг Франциядаги туризм элчиси этиб тайинланган машҳур актёр, Астерикс ва Обеликс ҳақидаги фильмларда бақалоқ Обеликс роли билан танилган Жерар Депардье Хивага борибди (аввалроқ у Тошкентдаги Ислом цивилизацияси марказида бўлгани, шунингдек, Бухорода Пои Калон мажмуасига ташриф буюргани ҳақида хабар берилган эди).
Ўз даврида Ўзбекистоннинг энг қудратли хонимларидан бири билан дуэт ҳам куйлаган Жерар Депардье ҳозирда «Ипак йўли» ҳужжатли фильмини суратга олиш ишлари доирасида Ўзбекистонда бўлиб турибди. 26 ноябргача давом этадиган саёҳат давомида француз Самарқанд ва Термизда ҳам бўлиши айтилмоқда.
Дунё нотинч
Боливияда президент Эво Моралеснинг истеъфоси талаби билан бошланган сиёсий инқироз давомида 23 киши ҳалок бўлган, 715 киши жароҳат олган. Эронда ҳам 15 ноябрдан бери нотинчлик — шу куни мамлакатда бензин нархини икки баробар ошириш тўғрисидаги қарор эълон қилинган эди; камида 30 киши ҳалок бўлган, дейилмоқда. Тбилисида ҳам намойишлар, минглаб одамлар ҳукуматни ваъдабозликда айбламоқда — сайлов қонунчилигига ўзгартириш киритиш бўйича ваъда бажарилмагани норозиликка сабаб бўлган.Шинжоннинг ноодатий раҳбарлари ҳақида
The New York Times Хитойнинг Шинжондаги қатағон сиёсати ва уйғурлар/мусулмонларни қайта тарбиялаш учун қурилган конслагерлар ҳақида улкан эксклюзив материал эълон қилди. «Мақоланинг ўзига хослик шундаки, у тўлиқ хитойлик бир виждонли амалдор томонидан тақдим этилган махфий ҳужжатларга асосланган», — деб ёзади «Ташқарида» канали.Масалан, Шинжоннинг Ёркент ноҳиясига раҳбар этиб тайинланган Ванг фамилияли хитойлик уйда Қуръон сақлашнинг ёмон жойи йўқ деб ҳисоблаган, конслагерлардаги 7 мингдан ортиқ тутқунни қўйиб юборган ва ҳоказо. Охир-оқибат у «партия ички буйруқларига бўйсунмаслик» айби билан ҳибсга олинган.
Наггецлар Робин Гуди
Канадалик блогер Коди Бондарчук куни кеча бир «жинояти»ни тан олибди — у авваллари, МcДональд’да ишлаган вақти мижозларнинг порциясига ҳар доим яширинча 11-наггецни қўшиб қўйган (ўзининг қўшимча қилишича, бу хатти-ҳаракати компанияга тахминан 1600 доллар зарар келтирган бўлиши мумкин).https://twitter.com/Chuckgofer/status/1195863936878436359
Бондарчукнинг бу твити бир лаҳзада оммалашиб, арзимас вақт ичида 800 мингдан ортиқ ретвит йиққан; комментларда фойдаланувчилар уни мақтовларга кўмиб ташлашган («У — қаҳрамон!») — охир-оқибат унинг ўзи ҳам мақомини «Наггецлар Робин Гуди» деб ўзгартириб қўйган. МcДональдс’нинг ўзи ҳозирча жим.
Изоҳ (0)