16 ноябрь, шанба куни Ўзбекистон Соғлиқни сақлаш вазирлиги ташаббуси билан мамлакат бўйлаб пиёда юриш марафони ташкил этилди. Бу ҳақда вазирлик жамоатчилик билан алоқалар бўлими хабар берди.
Пиёда юриш марафони 18 ноябрь Ўзбекистон байроғи қабул қилинган кун муносабати билан ташкил этилди.
Пойтахтда бўлиб ўтган тадбирда Ўзбекистон Бош вазири ўринбосари, хотин-қизлар қўмитаси раиси Элмира Боситхонова ва Соғлиқни сақлаш вазири Алишер Шодмонов иштирок этди.
«Маълумки, ҳозирги урбанизация даврида камҳаракатлилик бутун дунёда муаммога айланган. Ҳолсизлик, уйқучанлик, уйқунинг бузилиши, диққат-эътиборни жамлашнинг секинлашиши, хотиранинг пасайиши, сабабсиз чарчаш ҳисси, семизлик — бу каби белгилар кўпчиликда учрайди. Лекин камдан-кам одамлар бу ҳолатларни камҳаракатлилик билан боғлайди. Шу боис ҳам, Соғлиқни сақлаш вазирлиги фуқароларни фаол ҳаракатга чақириб, мунтазам равишда юриш марафонини ташкил қилиб келмоқда. Ушбу жараёнда фаол иштирок этиш учун озгина ҳавсала қилсак бас. Аслида ҳам юриш барча спорт турлари орасида энг осони ва қулайи ҳисобаланади. Бунинг учун жуда кўп энергия сарфлашнинг ҳожати йўқ. Ижобий таъсири эса жуда юқори. Юриш организмнинг умумий ҳолатига таъсир кўрсатади, мушакларни бақувват қилади, суяк тўқимасини мустаҳкамлайди, ҳаракатларни мувофиқлаштиришни ривожлантиради», — дейилади хабарда.
Мутахассисларнинг маълум қилишича, ҳафтада атиги 2,5 соатлик жисмоний фаоллик эрта ўлим ҳолатларини 28 фоизга, юрак касалликларини эҳтимолини эса 20 фоизга камайтирар экан. Яъни, ҳафтада камида 150 дақиқа жисмоний фаол бўлган инсонлар камроқ ҳаракатланадиганларга қараганда соғломроқ экан. Бундан ташқари, жисмоний фаоллик натижасида организмда биосинтез жараёни фаоллашади, қон айланиш жараёни 4-5 марта кучаяди, юрак қисқаришлари сони тезлашади, бу эса организмда янги энергия ҳосил бўлишига ва энергия билан таъминланиш яхшиланишига олиб келади.
Соғлом турмуш тарғиботига қаратилган ушбу оммавий пиёда юриш марафони мамлакатнинг барча ҳудудларида кўтаринки руҳда ташкил этилди. Жумладан, пойтахтдаги «Ашхобод» сайилгоҳида ўтказилган марафонда минглаб аҳоли иштирок этди, дейилади хабарда.
Изоҳ (0)