Jahongir Ortiqxo‘jayev va jurnalistlar mojarosi
Yakshanba Toshkent shahar hokimi Jahongir Ortiqxo‘jayevning ovozi yozilgan audio muhokamasi bilan o‘tdi. “Adolat”, O‘zXDP, O‘zLiDeP hokimni qoraladi, AOKA, Bosh prokuratura va Adliya vazirligi o‘rganish olib borayotganini ma’lum qildi, “Milliy tiklanish” shu o‘rganishlardan keyin munosabat bildirishni ma’qul deb topdi, Jurnalistlar ijodiy uyushmasi esa dastlabki uch partiya kabi munosabat bildirdi. Bu orada hokimning bu qahrli so‘zlari aynan kimlarga qaratilgani ma’lum bo‘ldi — “Kun.uz” jurnalistlariga.
17-noyabr oqshomida hokim “Kun.uz” jamoasi bilan uchrashgan. Sayt bayonotiga ko‘ra, “tomonlar o‘zaro murosaga kelgan, tahririyat hokimning ushbu vaziyat yuzasidan bildirgan mulohazalarini qoniqarli deb topgan”. Shuningdek, “Kun.uz” jamoatchilikdan ushbu masalani ortiq muhokama qilmaslikni so‘ragan, sababi — bu nizo turli siyosiy kuchlar va shaxslar (kimlar?) tomonidan “tor manfaatlar yo‘lida qurol sifatida foydalanilishi” mumkin.
Is gazidan zaharlanganlar
Namangan viloyatining Uychi tumanida 17-noyabrga o‘tar kechasi bir oilaning to‘rt a’zosi is gazidan zaharlagan. Hodisa oqibatida ota tuman shifoxonasiga yotqizilgan, ona va ikki farzand esa voqea joyida vafot etgan. “Qo‘lbola yasalgan isitish pechiga propan gaz balloni rezina shlang orqali ulanib uy ichida foydalanilgan, oqibatda esa is gazi hosil bo‘lgan”.10-noyabr kuni Nukusda er-xotin is gazidan zaharlanib o‘lgani haqida xabar berilgan edi; 11-noyabr kuni Rishtonda voyaga yetmagan ikki opa-singil hammomda is gazidan halok bo‘lgan edi; 15-noyabr kuni esa Jizzaxning Do‘stlik tumanida bir oilaning uch a’zosi is gazidan zaharlangan, oila boshlig‘i voqea joyida vafot etgan edi. Haqiqiy qahratonli kunlar esa hali oldinda...
Shoir Bobur Bobomurodning Andijon hokimiga murojaatiga
“Ravon mingim keladi, paxta tergim keladi” deb yozgan shoirga Andijon viloyati hokimi Nexia avtomobili sovg‘a qilgani haqidagi xabar internetda chakana shov-shuv bo‘lgani yo‘q. Shoir Sharofiddin Boltaboyevning she’riga boshqa shoir — Bobur Bobomurod munosabat bildirdi (batafsil — bu yerda). Qiziq mulohazalar: “Hokimni ham tantiligi tutdi, ‘Ravon’ nima bo‘libdi — Andijonda ‘Ravon’ chiqadi, bervorishibdi. Mayli, hamma shoirga bersin. Odamlarga iltimos qilaman, bunaqa yomon, g‘arazli gaplarni aytmanglar. Tasavvur qilinglar, Sharofiddin aka lotereya o‘ynadi, lotereyada shu mashinani yutdi. Omadini bersin, bizga ham nasib qilsin”.Obeliks — Xivada
O‘zbekistonning Fransiyadagi turizm elchisi etib tayinlangan mashhur aktyor, Asteriks va Obeliks haqidagi filmlarda baqaloq Obeliks roli bilan tanilgan Jerar Depardye Xivaga boribdi (avvalroq u Toshkentdagi Islom sivilizatsiyasi markazida bo‘lgani, shuningdek, Buxoroda Poi Kalon majmuasiga tashrif buyurgani haqida xabar berilgan edi).
O‘z davrida O‘zbekistonning eng qudratli xonimlaridan biri bilan duet ham kuylagan Jerar Depardye hozirda “Ipak yo‘li” hujjatli filmini suratga olish ishlari doirasida O‘zbekistonda bo‘lib turibdi. 26 noyabrgacha davom etadigan sayohat davomida fransuz Samarqand va Termizda ham bo‘lishi aytilmoqda.
Dunyo notinch
Boliviyada prezident Evo Moralesning iste’fosi talabi bilan boshlangan siyosiy inqiroz davomida 23 kishi halok bo‘lgan, 715 kishi jarohat olgan. Eronda ham 15-noyabrdan beri notinchlik — shu kuni mamlakatda benzin narxini ikki barobar oshirish to‘g‘risidagi qaror e’lon qilingan edi; kamida 30 kishi halok bo‘lgan, deyilmoqda. Tbilisida ham namoyishlar, minglab odamlar hukumatni va’dabozlikda ayblamoqda — saylov qonunchiligiga o‘zgartirish kiritish bo‘yicha va’da bajarilmagani norozilikka sabab bo‘lgan.Shinjonning noodatiy rahbarlari haqida
The New York Times Xitoyning Shinjondagi qatag‘on siyosati va uyg‘urlar/musulmonlarni qayta tarbiyalash uchun qurilgan konslagerlar haqida ulkan eksklyuziv material e’lon qildi. “Maqolaning o‘ziga xoslik shundaki, u to‘liq xitoylik bir vijdonli amaldor tomonidan taqdim etilgan maxfiy hujjatlarga asoslangan”, — deb yozadi “Tashqarida” kanali.Masalan, Shinjonning Yorkent nohiyasiga rahbar etib tayinlangan Vang familiyali xitoylik uyda Qur’on saqlashning yomon joyi yo‘q deb hisoblagan, konslagerlardagi 7 mingdan ortiq tutqunni qo‘yib yuborgan va hokazo. Oxir-oqibat u “partiya ichki buyruqlariga bo‘ysunmaslik” aybi bilan hibsga olingan.
Naggetslar Robin Gudi
Kanadalik bloger Kodi Bondarchuk kuni kecha bir “jinoyati”ni tan olibdi — u avvallari, McDonalds’da ishlagan vaqti mijozlarning porsiyasiga har doim yashirincha 11-naggetsni qo‘shib qo‘ygan (o‘zining qo‘shimcha qilishicha, bu xatti-harakati kompaniyaga taxminan 1600 dollar zarar keltirgan bo‘lishi mumkin).https://twitter.com/Chuckgofer/status/1195863936878436359
Bondarchukning bu tviti bir lahzada ommalashib, arzimas vaqt ichida 800 mingdan ortiq retvit yiqqan; kommentlarda foydalanuvchilar uni maqtovlarga ko‘mib tashlashgan (“U — qahramon!”) — oxir-oqibat uning o‘zi ham maqomini “Naggetslar Robin Gudi” deb o‘zgartirib qo‘ygan. McDonalds’ning o‘zi hozircha jim.
Izoh (0)