Италиянинг Каррара шаҳрида италян ёзувчиси Марта Тонжанининг «Юрак амри билан. Апуандаги қаршилик ва совет жангчиларининг ҳиссаси» номли китоби тақдимоти ўтказилди, деб хабар беради «РИА Новости».
Тонжани ўз китобида Сталинград остонасидаги жангда немисларга асир тушган ўзбекистонлик аскар Аҳмад Мамажонов ҳақида сўз юритади.
Немисларнинг қўлида мажбурий меҳнатга жалб қилинган Аҳмад Мамажонов италиялик Жино Крудели билан танишади. Крудели Мамажоновнинг қочишига ёрдам беради. Улар кейинчалик италян қаршилик кучлари сафида содиқ дўстларга айланади.
«Урушдан кейинги 35 йиллик сукутдан сўнг италиялик ҳарбийлардан бири совет ва италян газеталари орқали ўз дўстини излай бошлади. Шу тарзда улар топишиб, ёзиша бошлади. Бу ёзишмаларда мен таржимон вазифасини бажарардим. Беш йиллик ёзишмалардан сўнг Москва ва Ленинград шаҳарларида уларнинг иштирокидаги совет ва италян делегациялари учрашуви ташкил этилди», — дейди Тонжани.
Унинг сўзларига кўра, Мамажонов билан суҳбатлашиб у марказий Италияда бошқа совет аскарлари ҳам жанг қилганидан хабар топган.
Италияда улар ҳақидаги маълумотлар сақлаб қолинмаган. Тонжани архиви кўтариб, италян партизанлари ташкилотига мурожаат қилди. Шундан сўнг Апуан қаршилигида 70 нафар совет жангчиси иштирок этганини аниқлади. Уларнинг исмлари нашр этилган китобдан ўрин олган.
«Мамажонов Круделининг оиласига жуда ўрганиб қолган эди. Жинони у акасидек кўрарди. Уларнинг дўстлиги ҳақидаги китобни ёзишни ўзимнинг маънавий бурчим деб ҳисобладим», — дейди Тонжани.
2018 йилда Иккинчи жаҳон уруши пайтида фашистлар томонидан қийноққа солинган, кейинчалик ваҳшийларча отиб ташланган ўзбеклар хотирасини абадийлаштиришга бағишланган «101» номли китоб нашр этилган эди.
Изоҳ (0)