Ливанда Молия вазирлиги собиқ раҳбари Муҳаммад Сафадий республикада ҳукумат раҳбарига айланиши мумкин. Бу ҳақда «8 март коалицияси» «Тавҳид» ҳаракати етакчиси Виам Ваҳҳоб Twitter’даги саҳифасида хабар берган.
«Сиёсатчилар ва технократлар етакчиси Муҳаммад Сафадий ҳукумат бош вазири лавозимига тайинланиши мумкин», — дея таъкидлаган Ваҳҳоб. Бош вазир вазифасини бажарувчи Саъд Ҳаририйнинг «Ал-Мустакбал» ҳаракати, озод ватанпарварлар ҳаракати, «Амал» ҳаракати ва «Ҳизбуллоҳ» шиалар ҳаракати билан бу борада келишиб олинган.
Ливанда норозилик намойишлари 17 октябрда бошланган, 29 октябрда бош вазир Саъд Ҳаририй ва унинг коалицион ҳукумати истеъфога чиқди. Энди норозилик билдираётган халқ парламентнинг тарқатиб юборилиши ва сайловлар қайта ўтказилишини талаб қилмоқда.
Ливан президентини Мишель Ауннинг маҳаллий телеканалларга берган интервьюси навбатдаги норозилик намойишлари тўлқинини келтириб чиқарди. Давлат раҳбари норозилик билдираётган фуқароларни уйларига тарқалишини сўраган, агар намойишлар тўхтамаса, мамлакатда иқтисодий инқироз бошланишини билдирган.
Изоҳ (0)