Айни кунларда Ички ишлар вазирлиги Малака ошириш институти томонидан Тошкент ва Фарғона вилоятларидаги туманлар ва шаҳарлар ички ишлар органларининг миграция ва фуқароликни расмийлаштириш бўлим (бўлинма)лар бошлиқлари, терроризм ва экстремизмга қарши кураш бўлимлари тезкор вакиллари, йўл ҳаракати хавфсизлиги хизмати офицерлар таркиби учун малака ошириш сайёр ўқув йиғинлари ўтказилмоқда. Бу ҳақда институт матбуот хизмати «Дарё»га маълум қилди.
Ўқув йиғинларида Ўзбекистон Президенти томонидан ички ишлар органлари фаолиятига оид белгилаб берилган долзарб вазифаларга, уларнинг мазмун-моҳияти ва аҳамиятига, соҳага оид қабул қилинган янги норматив-ҳуқуқий ҳужжатларнинг талаблари билан таништиришга ва улар асосида хизмат фаолияти самарадорлигини оширишга алоҳида эътибор қаратилмоқда.
Бундан ташқари, халқ манфаатларига хизмат қилиш ички ишлар органлари фаолиятининг асосий мезони эканлиги, аҳоли билан доимий манзилли мулоқот ўрнатиш, коррупцияга қарши курашиш ва унинг олдини олишга доир чора-тадбирлар, фуқаролик жамияти институтлари билан яқин ҳамкорликни йўлга қўйиш тизимининг зарурати ва аҳамияти тушунтирилмоқда.
Ўқув йиғинига жалб қилинган ходимларга жойдаги ички ишлар органларида хизматни тўғри ташкил қилиш, ҳуқуқбузарликлар профилактикаси самарадорлигини ошириш, жамоат хавфсизлигини таъминлаш, фуқароларнинг ҳуқуқлари, эркинликлари ҳамда қонуний манфаатларини ҳимоя қилиш борасидаги муаммолар ва уларнинг ечимлари юзасидан тегишли тавсиялар берилмоқда.
Институт профессор-ўқитувчилари томонидан жойларда сайёр ўқув йиғинлари, маҳаллаларда тарғибот тадбирлари ҳамда кам таъминланган оилалар, ногиронлиги бор фуқаролар ва якка ёлғиз кекса авлод вакилларининг ҳолидан хабар олиш каби эзгу ишлар жойларда давом этмоқда.
Изоҳ (0)