ИИВ Human хусусий бандлик агентлиги раҳбарининг озодликда эканлиги ҳақидаги хабарларга муносабат билдирди

Ижтимоий тармоқларда «Human хусусий бандлик агентлиги» МЧЖ раҳбари Шоҳнур Файзуллаевга нисбатан жиноят иши бўйича қамоқ билан боғлиқ бўлмаган бошқа эҳтиёт чораси қўлланилганлиги ва унинг озодликда эканлиги ҳақида хабарлар тарқалди. Хабарларда жабрланувчиларга етказилган моддий зарар ундирилмаганлиги иддао қилиниб, жабрланган фуқароларни ҳукумат идоралари олдида чиқишлар қилишга ундалган. Ўзбекистон Ички ишлар вазирлиги Тергов департаменти мазкур хабарларга муносабат билдирди.

Қайд этилишича, бу каби даъволар асоссиз ва ҳақиқатга тўғри келмайди.

Хабар берилишича, Тергов департаменти иш юритувида «Human хусусий бандлик агентлиги» МЧЖ мансабдор шахсларига нисбатан Ўзбекистон Республикаси Жиноят кодексининг 168-моддаси 4-қисми «а» банди (фирибгарлик) билан қўзғатилган жиноят иши юзасидан тергов ҳаракатлари олиб бормоқда.

Дастлабки тергов давомида Шоҳнур Файзуллаевга нисбатан Ўзбекистон Республикаси Жиноят кодексининг 168-моддаси 4-қисми «а» банди билан айблов эълон қилинган ва қамоққа олиш тарзидаги эҳтиёт чораси қўлланилиб, ҳозирда у ИИВ Жазони ижро этиш бош бошқармасига қарашли 1-сонли тергов ҳибсхонасида сақланмоқда.

Жабрланувчиларга етказилган моддий зарарнинг ўрнини қопланишини таъминлаш мақсадида, Шоҳнур Файзуллаев фирибгарлик йўли билан қўлга киритган пул маблағлари ҳисобидан харид қилинган мол-мулкларни, шунингдек ўзлаштириб юборилган ва сарфланган пул маблағларни аниқлаб, уларни хатлаш чоралари кўрилмоқда.

Жиноят иши юзасидан тергов ҳаракатлари давом этмоқда, тергов якуни бўйича қонуний қарор қабул қилиниши таъминланади, дейилади департамент хабарида.

Тергов департаменти фуқаролардан норасмий маълумотларга ишонган ҳолда бирор-бир ҳуқуқбузарлик содир этишдан ўзларини тийишни ҳамда ИИВ ҳузуридаги Тергов департаменти томонидан жиноят иши бўйича бериб бориладиган расмий маълумотларга асосланишни сўраган.