Жамоат транспортининг эркин ҳаракатланишида нафақат йўлларда транспорт воситаларининг кўплиги, балки, енгил автомобилларнинг тўхташ мумкин бўлмаган жойларга қўйиб кетилиши автобуслар тирбандлигини келтириб чиқармоқда, деб хабар бермоқда «Тошшаҳартрансхизмат».
Қайд этлишича, оралиқ ва шоҳбекатлар ҳудудида енгил автомобилларнинг қолдирилиши автобусларнинг ҳаракатида жиддий муаммоларга сабаб бўляпти.
Хусусан, «Тошшаҳартрансхизмат» АЖ тасарруфидаги йўналишлар бўйича «Тошкент универмаги» шоҳбекатига кирувчи автобус ҳайдовчилари анчадан буён ушбу муаммодан азият чекмоқда.
Шоҳбекат ҳудуди йўл ҳаракати хавфсизлиги ходимлари томонидан қанчалик назорат қилинмасин вазият кун сайин оғирлашиб бормоқда. Автобуслар шоҳбекатга киролмай вақт йўқотишига, оралиқ интервалларнинг узайиб кетишига олиб келяпти.
Жорий йил 12 ноябрь куни тахминан 14:00 атрофида «Тошшаҳартрансхизмат» ҳаракат хавфсизлиги бўлими ходимлари ушбу шоҳбекат ҳудудида енгил автомобилларнинг автобуслар ҳаракатига халақит бераётгани, муаммони бартараф этишга ёрдам беришларини сўраб йўл ҳаракати хавфсизлиги бошқармасига мурожаат қилди. Инспекторлар қисқа муддатда бу ердаги сунъий тирбандликни тарқатиб кетишди. Аммо орадан 10 дақиқа ўтмай шоҳбекат яна хусусий енгил автомобилларнинг турар жойига айланиб улгурди.
Юзага келаётган ана шундай вазиятни инобатга олиб, «Тошшаҳартрансхизмат» АЖ раҳбарияти барча енгил автомобиль эгаларини огоҳлантиради. Бундан буён оралиқ ва шоҳбекатларда қаровсиз қолдирилган ва автобуслар ҳаракатига халақит бераётган транспорт воситалари мутасаддилар томонидан суратга олиниб, йўл ҳаракати хавфсизлиги бошқармасига тақдим этилади.
Изоҳ (0)