Тошкент шаҳар ИИББ ЙҲХБ ЙПХ ходимлари пойтахт ҳокимлиги билан ҳамкорликда халқаро тажрибага асосланган ҳолда, синов тариқасида шаҳар йўлларида тирбандлик билан курашишнинг янги услубини жорий қилди.
Мазкур чизиқни қўллаш қарори қабул қилинишига Сингапурдаги муваффақиятли тажриба сабаб бўлди: ушбу янгилик сабабли Сингапур ҳукумати йўллардаги ҳолат яхшиланишига эришган.
Ўтган ҳафтанинг охирида пойтахтдаги бир неча чорраҳаларда ётқизилган янги йўл чизмаси ташқи кўриниши сабабли халқ тилида «Вафли чизиқлари» деб номланади. Чизиқлар ёрдамида ҳаракат йўналишида тирбандлик юзага чиққан ҳолатда чиқиш мумкин бўлмаган ҳудуд белгилаб олинади ва ҳайдовчи тўхташга мажбур бўлади. «Вафли чизиқлари» ЙҲҚ билан белгиланган баъзи ҳолатларда ўнг ёки чап томонга бурилишни тақиқламайди.
Чизиқлар параллел кесишадиган сариқ рангли диагонал чизиқлардан ҳосил бўлган катаклар кўринишига эга. «Вафли чизиқлари» мустақил тарзда ҳамда чорраҳага яқинлашиш ҳақида огоҳлантирувчи йўл белгиси билан бирга қўлланилиши мумкин.
Ҳозирги вақтда сариқ рангли катаклар Нукус кўчасининг Бобур, Абдулла Қаҳҳор, Глинка, Бешёғоч, Миробод, Авлиё ота, Афросиёб кўчалари билан кесишмасида – жами еттита чорраҳада чизилган.
Синов тариқасида чизилаётган чизиқлар тирбандликлар кўп учраб турадиган бошқариладиган чорраҳаларда қўлланилади.
Яқин кунларда пойтахтнинг яна 18 та чорраҳаларида, яъни қуйидаги кўчалар кесишмаларида «вафли чизиқлари»ни ташкил этиш режалаштирилмоқда: Нукус – Тарас Шевченко, Нукус – Амир Темур, Нукус – Истиқбол, Мустақиллик – Оққўрғон, Мустақиллик – Сайрам (7-йўл), Мирзо-Улуғбек – Дўрмон йўли, Дўрмон йўли – Мингбулоқ, Дўрмон йўли – Ғазалкент, Дўрмон йўли – Темур Малик, Мустақиллик – Шастри, Мустақиллик – Шаҳрисабз, Шаҳрисабз – Амир Темур, Алишер Навоий – Зарафшон, Шароф Рашидов – Алишер Навои, Шараф Рашидов – Матбуотчилар, Шараф Рашидов – Афросиёб, Фидоилар – Афросиёб, Шаҳрисабз – Афросиёб.
Режалаштирилган ишлар якунлангач, Тошкентдаги қамралган чорраҳаларнинг умумий сони 25 тани ташкил этади.
Эслатиб ўтамиз, (Ўзбекистон Республикаси Вазирлар Маҳкамасининг «Йўл ҳаракати қоидаларини тасдиқлаш тўғрисида»ги Қарори) «Чорраҳада ҳаракатланиш» бобидаги 97-бандга мувофиқ,
«Ҳайдовчи тирбандлик туфайли мажбурий тўхтаб, кўндаланг йўналишдаги транспорт воситаларининг ҳаракатланишига тўсқинлик туғдирадиган бўлса, чорраҳа ёки қатнов қисмлари кесишмасига кириши тақиқланади».
«Аммо ҳозирги вақтда баённомаларни расмийлаштириш кўзда тутилмаяпти: ҳайдовчиларга чизманинг талабларини ўрганиб чиқиш учун вақт ва унга кўникиш учун имконият берилади», — дейилади хабарда.
Изоҳ (0)