ИШИД террористик ташкилоти 6 ноябрь куни Тожикистон—Ўзбекистон чегарасидаги «Ишқобод» постига уюштирилган қуролли ҳужум учун масъулиятни ўз зиммасига олди. Бу ҳақда террорчиларнинг интернет тармоғидаги фаолиятини кузатиб борувчи порталга асосланиб «Интерфакс» хабар берган.
5 ноябрдан 6 ноябрга ўтар кечаси 20 нафар жангарилар Душанбедан 60 километр узоқликдаги «Ишқобод» постининг «Султонобод» ҳарбий отрядига ҳужум қилган, тўқнашув натижасида номаълум шахслар чегарчиларнинг автоматларини эгаллаб олган, хавфсизлик ходимлари ўтказган тезкор махсус ҳарбий операция давомида қуролланган жиноий гуруҳнинг 15 нафар аъзоси йўқ қилинган ва 5 нафар жангари қўлга олинган.
Жангарилар сўроқ қилинганидан кейин уларнинг Афғонистон ҳудудидан қочиб ўтган ИШИД террорчилари эканлиги аниқланган. Ҳужум уюштирганларнинг барчаси Тожикистон фуқаролари бўлгани, қўлга олинган ва ҳалок бўлганлар орасида аёллар ҳам борлиги хабар қилинди. Афғонистон ҳукумати вакиллари ИШИД террорчиларининг мамлакат ҳудудидан Тожикистонга ўтиб, 6 ноябрда чегара постига ҳужум уюштирганини инкор этди.
8 ноябрь куни Тожикистон бош прокуратураси чегара постига уюштирилган ҳужум юзасидан жиноят иши очган, Ўзбекистон чегарачилари эса террорчилик ҳужумидан сўнг Тожикистон билан чегарадош ҳудудларни қўриқлашни кучайтирган. Тожикистон чегара постига уюштирилган ҳужумнинг янги тафсилотлари маълум бўлди. Аввал ҳужум натижасида ҳалок бўлган Тожикистон ҳарбийларининг сони расман эълон қилинганидан кўпроқ экани маълум бўлганди. Ҳалок бўлганлар сафига 7 ноябрда Сўғд вилоятида дафн қилинган яна бир ҳарбий қўшилди. У – Ғофуров туманида яшаган оддий аскар Наимжон Саидалимов. Унинг дафн маросимида ҳам Сўғд вилояти ва туман ҳокимлиги расмийлари иштирок этган. Яна бир оддий аскар Ғанижон Давлатнинг ҳам ҳужумда ҳалок бўлгани айтилмоқда, бироқ бу ҳали расман ўз тасдиғини топгани йўқ. Дастлаб Тожикистон томондан ҳалок бўлганлар сони 2 нафар эди, кейинчалик уларнинг 6 нафар экани маълум бўлган. Чегарачилардан 26 ёшли Изатилло Абубакр, Диловор Толипов, Ҳофизжон Ҳусаинов, Наимжон Саидолимов, Ғанижон Давлат ва бир нафар участка нозири, милиционер Баҳром Шаҳзода.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)