Қашқадарё вилояти ҳокими вазифасини бажарувчи Зоир Мирзаев вилоятдаги тадбиркор ва ишбилармонлар билан юзма-юз учрашув ўтказиб, уларнинг муаммолари билан қизиқди. Бу ҳақда вилоят ҳокимлиги ахборот хизмати хабар берди.
Ғузор туман ҳокимининг қарорига асосан, «Хўжагузар» маҳалла фуқаролар йиғинида яшовчи фуқаро Умид Холиқовга «Болалар истироҳат боғи» қуриш учун ер ажратилган. Аммо ушбу ер майдони «Шўртаннефтгаз» МЧЖ тасарруфидаги «Шўртан» футбол клуби билан низоли бўлганлиги сабабли тадбиркор томонидан қурилиш ишлари тўхтаб қолган.
Тадбиркорлар билан учрашувда вилоят ҳокими Ғузор тумани ҳокими Саъдулла Бабақулов, «Шўртаннефтгаз» МЧЖ раҳбари Шокир Жабборов ва тадбиркор Умид Холиқов билан алоҳида суҳбатлашиб, тадбиркорни қийнаб келаётган масалага ойдинлик киритилган. Муаммо шу жойнинг ўзида ҳал этилган.
Тадбиркорнинг айтишича, «Болалар истироҳат боғи» қурилиши учун умумий қиймати 2 миллиард сўм маблағ сарфланиши белгиланган. Тадбиркор томонидан 1 миллиард 200 миллион сўм ҳамда 800 миллион банк кредити ҳисобидан қурилиши режалаштирилган истироҳат боғи 2020 йил Наврўз байрами арафасида фойдаланишга топширилади.
Изоҳ (0)