Коррупцияга қарши курашиш бўйича республика идоралараро комиссияси ишчи органи ҳисобланган Бош прокуратура томонидан «Ўзбекнефтгаз» ва «Ўзкимёсаноат» компанияларида коррупцияга қарши курашиш бўйича янги назорат тизими жорий қилинмоқда. Бу ҳақда Бош прокуратура томонидан маълум қилинди.
Хабар берилишича, БМТ Тараққиёт дастурининг «Ўзбекистонда самарали, ҳисоб берувчи ва шаффоф бошқарув институтлари орқали коррупцияга қарши курашиш» лойиҳаси ҳамкорлигида «Ўзкимёсаноат» ва «Ўзбекнефтгаз» акциядорлик жамиятларида коррупцияга қарши курашиш чораларини кучайтириш мақсадида коррупцияга қарши курашнинг комплаенс назорат (compliance control) тизимини жорий этиш бўйича ишлар бошланди.
Ушбу лойиҳа етакчи халқаро ташкилотлардан бири ҳисобланган Италиянинг халқаро аудиторлик компанияси KPMG экспертлари билан биргаликда амалга оширилмоқда.
Таъкидланишича, лойиҳа бўйича ўтказилган тақдимот давомида KPMG экспертлари мазкур лойиҳани халқаро экспертларнинг фаол қўллаб-қувватлаши билан амалга оширилиши компанияларда коррупцияга қарши халқаро стандартлар ва амалиётларни самарали жорий этишга имкон беришини, шунингдек, жамиятларнинг шаффофлиги, корпоратив бошқарув даражаси ва инвестициявий жозибадорлиги ошишини таъкидлаб ўтди.
Бундан ташқари, мазкур акциядорлик жамиятларида коррупцияга қарши чораларни самарали амалга оширишда тўпланган тажрибадан бошқа давлат ташкилотлари, компаниялар ва хўжалик юритувчи субъектларда коррупцияга қарши курашнинг умумий йўналишини шакллантириш учун фойдаланиш мумкинлиги қайд этилди.
Изоҳ (0)