2 ноябрь, шанба куни соат тахминан 23:45 да Фарғона вилояти Қўштепа туманида маст ҳолдаги ҳайдовчи М.А. томонидан тегишли ҳужжатларсиз бошқарилган «ВАЗ-2106» русумли автомашина иштирокида йўл-транспорт ҳодисаси содир бўлган. Бу ҳақда Ўзбекистон Республикаси ИИВ ҳузуридаги Тергов департаменти хабар берди.
Маълум қилинишича, ҳайдовчи бошқарувни йўқотганлиги сабабли автомашина Равнақ кўчасидаги кўприк ёнида, йўлнинг ўнг чеккасидаги бетон тўсиққа урилиб, олти нафар йўловчиси билан ағдарилган.
ЙТҲ оқибатида бир нафар йўловчи вафот этган, ҳайдовчи ва қолган йўловчилар эса турли даражада тан жароҳатлари олиб, шифохонага ётқизилган. Ҳодиса жойи тергов-тезкор гуруҳи томонидан кўздан кечирилиб, тегишли ҳужжатлар расмийлаштирилган.
Мазкур ҳолат юзасидан Қўштепа туман ИИБ ҳузуридаги Тергов бўлими томонидан Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлса) билан жиноят иши қўзғатилган.
Ҳозирда йўл-транспорт ҳодисасининг келиб чиқиш сабабларини аниқлаш юзасидан тегишли экспертизалар тайинланган бўлиб, дастлабки тергов давом этмоқда.
Изоҳ (0)