ФАО ва ШҲТ озиқ-овқат хавфсизлиги соҳасида ҳамкорлик қилади

БМТнинг Озиқ-овқат ва қишлоқ хўжалиги ташкилоти (ФАО) ва Шанхай ҳамкорлик ташкилоти 2 ноябрь куни Тошкентда озиқ-овқат хавфсизлигини таъминлаш ва барқарор ривожланиш соҳасида ҳамкорликни назарда тутувчи ҳамкорлик меморандумини имзолади, дея хабар бермоқда «Gazeta.uz».

Ҳужжат Шанхай ҳамкорлик ташкилоти (ШҲТ)га аъзо мамлакатлар Ҳукумат раҳбарлари кенгашининг 18-мажлиси доирасида ШҲТ бош котиби Владимир Норов ҳамда ФАОнинг бош директори ўринбосари ва Европа ва Марказий Осиё бўйича минтақавий вакили Владимир Раҳманин томонидан имзоланган.

«Ҳар икки ташкилот фаол ўрин тутадиган озиқ-овқат хавфсизлиги, қишлоқ хўжалиги ва экологик барқарорлик каби бутунли бошли соҳалар бор. Меморандумнинг имзоланиши — Барқарор ривожланиш соҳасидаги Мақсадларга эришиш йўлида янада мустаҳкам алоқалар ўрнатиш ва биргаликда иш олиб бориш йўлида дадил қадамдир. Барқарор келажакни қуриш — барча биргаликда, ҳамфикрлик билан ҳаракат қилиши лозим бўлган комплекс вазифадир», — деди Раҳманин.

Меморандум доирасида томонлар ўзаро ахборот алмашиш, озиқ-овқат хавфсизлиги ва барқарор ривожланиш соҳасидаги тадқиқот ва тажрибаларнинг натижаларини баҳам кўришга келишиб олди. Келишув иқлим ўзгариш оқибатларини юмшатиш, табиий ресурсларни барқарор бошқариш, қишлоқ хўжалигини рақамлаштириш бўйича ҳамкорликда фаолият олиб бориш ҳамда қишлоқ хўжалиги ва озиқ-овқат бозорлари бўйича биргаликда тадқиқотлар ўтказишни ҳам назарда тутади. Фитосанитария ва ветеринария хавфсизлиги, шаҳар шароитларида соғлом овқатланиш рационларини қўллаб-қувватлаш, шунингдек, Жануб-Жануб ҳамкорлигига кўмак кўрсатиш масалалари ўзаро манфаатли соҳалар сифатида кўрсатиб ўтилган.