31 октябрь куни Ўзбекистон ташқи ишлар вазири Абдулазиз Комилов ва Буюк Британия элчиси Тимоти Торлот Ўзбекистон ва Буюк Британия ўртасида шериклик ва ҳамкорлик тўғрисидаги битимни имзолади. Бу ҳақда Ташқи ишлар вазирлиги матбуот хизмати хабар берди.
Битим кенг қамровли ҳужжат бўлиб, у амалдаги ҳуқуқий асосни сақлаш ва томонлар ўртасидаги сиёсий, савдо-иқтисодий, саноат, транспорт, қишлоқ хўжалиги, энергетика, илмий-техникавий, молиявий ва бошқа соҳалардаги муносабатларни ривожлантиришга қаратилган.
Ушбу халқаро ҳужжат Буюк Британиянинг Европа Иттифоқидан чиқишидан сўнг, Ўзбекистон—Буюк Британия ҳамкорлигининг шартномавий муносабатлари давомийлигини таъминлашга ва барча соҳаларда ҳар томонлама амалий ҳамкорликни янада ривожлантиришга имкон яратади.
Шартнома томонларнинг ички давлат жараёнлари бажарилиши тўғрисидаги сўнгги ёзма маълумот олинган санадан, яъни кейинги ойнинг биринчи кунидан бошлаб кучга киради.
Ҳужжатда шартнома кучга киргунга қадар вақтинча қўллаш имконияти ҳам кўзда тутилган.
Изоҳ (0)