Жиззахлик маст эркак аэропорт портлатилиши ҳақида хабар берди

29 октябрь, сешанба куни Тошкент шаҳар Миробод туманида жойлашган «Евро Уборка» масъулияти чекланган жамиятига шубҳали бир қўнғироқ бўлган. Телефонда гапираётган номаълум шахснинг сўзлари корхона операторини шошириб қўйган. Бу ҳақда «Postda.uz» хабар берди.

Корхонага телефон қилган шахс аэропортдаги ички ишлар бўлимининг телефон рақамини сўраган ва муҳим гапи борлигини айтган. Номаълум шахс яқин вақт ичида аэропортда катта портлаш бўлишини ички ишлар идораларига айтмоқчи эканлигини билдирган ва телефон гўшагини қўйиб қўйган.

Олиб борилган дастлабки суриштирув ишлари натижасида ички ишлар бўлимига эмас, корхонага қўнғироқ қилган шахснинг ким экани аниқланди. Маълум бўлишича, уяли телефон орқали қўнғироқ қилган шахс Жиззах вилояти Пахтакор туманида яшовчи, муқаддам судланган Т.Ж. бўлган. У оқибатини ўйламай, маст ҳолда юқоридаги қўнғироқни амалга оширган.

Айни вақтда ҳолат юзасидан суриштирув ишлари олиб борилмоқда.