Ўзбекистон Қуролли Кучлари академиясида куч тузилмаларига қарашли «Темурбеклар мактаби» ва академик лицей ўқувчилари ўртасида илк бор «Темурбеклар» мусобақаси ўтказилди. Бу ҳақда Мудофаа вазирлиги ахборот ва оммавий коммуникациялар департаменти «Дарё»га маълум қилди.
Ёшларнинг маънавий савияси ва интеллектуал салоҳиятини юксалтириш, улар ўртасида буюк аждодларнинг ибратли ҳаётини кенг тарғиб қилиш, шунингдек, таълим самарадорлигини ошириш, тизимдаги илғор тажрибаларни оммалаштириш, ёшлар ўртасида ўзаро ҳамкорлик ва соғлом рақобат муҳитини яратиш мақсадида ташкил этилган беллашувда жами 18 та жамоа иштирок этди.
Қизғин ва баҳс-мунозарага бой ўтган беллашувда жамоалар сафда қўшиқ айтиб юриш, пневматик милтиқдан отиш, 3 километр масофага кросс югуриш, ахборот коммуникация технологияларидан фойдаланиш ва «Темур тузуклари» билимдони шартлари бўйича ўзаро куч синашди.
Беллашувда иштирок этган ҳар бир жамоа ғолиблик учун астойдил ҳаракат қилди. Уларнинг мусобақага пухта тайёргарлик кўриб келгани шартларни бажаришдаги фаоллигида ҳам яққол кўзга ташланди. Якуний натижалар умумлаштирилди ва кучли учлик аниқланди.
Унга кўра, Мудофаа вазирлиги тасарруфидаги Фарғона «Темурбеклар мактаби» жамоаси фахрли биринчи ўринни қўлга киритди. Иккинчи ўринни Ички ишлар вазирлигига қарашли Фарғона академик лицейи жамоаси эгаллади. Учинчи ўрин эса Миллий гвардия «Темурбеклар мактаби» жамоасига насиб этди.
Ғолиб ва совриндорлар кубок, медал, диплом ва эсдалик совғалари билан тақдирланди.
Изоҳ (0)