Ал-Бағдодийнинг ўлими: АҚШ Ироққа миннатдорчилик билдирди. Икки нафар номзод ИШИДнинг янги раҳбари бўлишга тайёрланмоқда
АҚШ ИШИД етакчиси Абу-Бакр ал-Бағдодийни йўқ қилиш бўйича операция вақтида саккизта вертолёт ва иккита дрондан фойдаланган. Бу ҳақда Meduza хабар берди.
Америка авиацияси 27 октябрга ўтар кечаси Идлиб вилоятининг Сурия—Туркия чегарасидаги Бариша қишлоғида жойлашган уйга бир нечта ракета зарбаларини йўллаган. Операция 4 соат давом этган. Авиазарба натижасида бино бутунлай қулаб тушган. Вайронага айланган ердан 7 нафар одамнинг, жумладан, уч эркак, уч аёл ва бир боланинг жасади қолдиқлари топилган. Айрим нашрлар, хусусан, Reuters ўз манбаларига таянган ҳолда 6 нафар одамнинг — уч эркак ва уч аёлнинг жасади топилган деб хабар берган.
WATCH: Video believed to show the U.S. operation in Syria which killed ISIS leader Abu Bakr al-Baghdadi pic.twitter.com/YeiiayogJt
— BNO News (@BNONews) October 27, 2019
Идлибнинг ҳаво бўшлиғини рус ҳарбийлари назорат қилади.
Ироқ разведкасининг исмини ошкор этишни истамаган вакили «РИА Новости»га ИШИД етакчиси Абу Бакр ал-Бағдодий, унинг икки нафар хотини, қўриқчисининг ўлдирилганини тасдиқлади.
«Ироқ ихтиёридаги маълумотлар Ал-Бағдодий, унинг икки нафар хотини ва қўриқчиси ўлдирилганлигини тасдиқлайди», — дея таъкидлаган Ироқ разведкаси вакили.
Унинг сўзларига кўра, Ироқ ИШИД етакчисининг ҳар бир қадами ҳақида коалицияга ахборот бериб турган.
«Айнан Ироқ разведкаси халқаро коалицияга Ал-Бағдодийнинг қаерга боргани ва қайси жойда яширинганлиги юзасидан, жумладан, у ўлдирилган жой ҳақида ҳам маълумотлар берган», — дейди разведка ходими.
Манбанинг қайд этишича, Коалиция ушбу маълумотларни олганидан кейин дрон ёрдамида Бағдодийнинг ҳаракатларини кузатиб турган ва у жойлашган уйга ҳаводан зарба йўллаган.
Аввал Ироқ ҳукуматидаги юқори лавозимда ишловчи амалдорлардан бири мамлакатнинг Ал-Бағдодийнинг ўлдирилишида катта ҳисса қўшганлигини маълум қилганди.
Вашингтон Ироқ ҳукуматига ИШИД етакчиси Абу Бакр ал-Бағдодийнинг йўқ қилиш бўйича махсус операцияга ёрдам берганлиги учун миннатдорчилик билдирди.
АҚШ Ироқ бош вазири Одил Абдул Маҳдийга йўллаган мактубда мамлакат миллий разведкасининг ал-Бағдодий яширинган жой ҳақида маълумот бергалиги учун ташаккур изҳор этган.
Бағдодий ўлдирилганлиги тўғрисида хабарлар тарқалганидан кейин ИШИДнинг бошқа етакчилари ва уларнинг ёрдамчилари «шок ҳолатига» тушиб қолган.
«ИШИД етакчиси ўлдирилгач, улар ушбу воқеада бир-бирларини айблашни бошлади ва гуруҳ аъзолари орасида тарқоқлик ҳукмронлик қилмоқда», — дейди Ироқ разведкаси вакили. Унинг сўзларига кўра, Ал-Бағдодий билан бирга унинг хавфсизлик хизматини бошқарган Газвон Ар-Раурий ҳамда ироқлик бир нечта террорчи ҳам ўлдирилган.
Ал-Бағдодий ўрнини унинг икки ёрдамчисидан бири эгаллаши мумкин. Al Mayadeen телеканали ИШИД террорчилари Абу Абдул Раҳмон ал-Жезрауий ҳамда Абу Усмон ал-Фарансий ташкилот раҳбарлигига даъвогар эканлигини хабар қилди.
ИШИД ичкарисидагилар талвасага тушган вақтда АҚШ судмедекспертлари ташкилот раҳбарининг ўлдирилганлигини тасдиқлаш учун операциядан кейин олиб келинган жасадлар қолдиқларини текширмоқда.
Бармоқ излари ва бошқа биометрик маълумотлар асосида ИШИД етакчисининг ҳақиқатдан ҳам йўқ қилинганлиги тасдиқланиши лозим.
Ал-Бағдодий — ҳақиқий исми-шарифи Иброҳим Авад Иброҳим ал-Бадрий 2014 йилдан бери ИШИД террорчиларининг раҳнамоси ҳисобланади. У шу йили ИШИД Мосулда эгаллаб олган масжидда Яқин Шарқ ҳудудида ислом ҳалифалиги ташкил қилинишини эълон қилган. Унинг ўлдирилганлиги ҳали расман ўз тасдиғини топганича йўқ.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
