Ахборот ва оммавий коммуникациялар агентлиги Ахборот технологиялари ва коммуникацияларни ривожлантириш вазирлиги ва бошқа манфаатдор давлат органлари билан ҳамкорликда ҳукумат қарори билан тасдиқланадиган 37 банддан иборат «Интернет жаҳон ахборот тармоғида миллий контентни янада ривожлантириш бўйича комплекс дастур»ни ишлаб чиқди. Бу ҳақда агентлик матбуот хизмати хабар берди.
Дастур Вазирлар Маҳкамасининг «Интернет жаҳон ахборот тармоғида миллий контентни ривожлантиришга доир қўшимча чора-тадбирлар тўғрисида»ги 888-сонли қарори билан қабул қилиниб тасдиқланди.
Дастурга мувофиқ, миллий веб-ресурслар сонининг ўсишига эришиш, Wikipedia интернет энциклопедиясида Ўзбекистон тўғрисида хорижий тиллардаги маълумотлар ҳажмини ошириш, мобил мессенжерларда миллий ахборот-кутубхона каналларини ривожлантириш, ўзбек адабиёти ва санъати мумтоз намоёндаларининг асарларидан иборат веб-портал ташкил қилиш каби бир қанча янги лойиҳалар амалга оширилади.
Бундан ташқари, архивларда жисмоний ва юридик шахсларга интерактив хизматлар кўрсатишни кенгайтириш, мамлакат тарихий-маданий мероси объектларининг 3D-форматдаги коллекцияларини яратиш, давлат органлари ва бошқа ташкилотлар веб-сайтлари мазмунини бойитиш, ўз фаолияти ҳақида аҳолини мунтазам хабардор қилиб бориш вазифаси топширилган.
Ҳужжатнинг тўлиқ матни билан қуйидаги ҳавола орқали танишиш мумкин.
Изоҳ (0)