O‘zbekistonning doimiy aholisi soni 2019-yil 1-oktabr holatiga 33,72 million kishini tashkil etdi, joriy yil boshidan buyon aholi soni 469 ming nafarga yoki 1,4 foizga ko‘paydi. Bu haqda Davlat statistika qo‘mitasining demografik vaziyat to‘g‘risidagi hisobotiga tayanib, “Gazeta.uz” xabar berdi.
Respublika hududlari kesimida tahlillarga ko‘ra, eng ko‘p aholi soni Samarqand viloyatida bo‘lib, respublika aholisi sonidagi ulushi 11,4 foizni tashkil etgan. Keyingi o‘rinlarda Farg‘ona viloyati 11,1 foiz, Qashqadaryo viloyati 9,7 foizni va Andijon viloyatida 9,2 foiz bilan joylashgan.
Respublika doimiy aholisi sonining 30,5 foizi mehnatga layoqatli yoshdan kichiklar, 59,1 foizi mehnatga layoqatli yoshdagilar va 10,4 foizi mehnatga layoqatli yoshdan kattalar hisoblanadi.
Qayd etilishicha, 2019-yilning to‘qqiz oyi davomida 589,7 ming nafar bola tug‘ilgan bo‘lsa, bu davr mobaynida 112,2 mingta o‘lim holati qayd etilgan.
Qayd etilgan o‘lim holatlarining 60,6 foizi — qon aylanish tizimi kasalliklari, 9,8 foizi — o‘simtalar, 6,4 foizi — baxtsiz hodisa, zaharlanish va jarohatlanishlar, 5,5 foizi — ovqat hazm qilish a’zolari kasalliklari, 4,2 foizi — nafas olish a’zolari kasalliklari, 1,4 foizi — yuqumli va parazitar kasalliklar hamda 12,1 foizi — boshqa kasalliklar sababli yuz bergan.
Ro‘yxatga olingan bir yoshgacha vafot etgan bolalar soni 5,3 ming nafarni tashkil etib, ularning 58,7 foizi — perinatal davrda yuzaga keladigan holatlardan, 18,2 foizi — nafas olish a’zolari kasalliklaridan, 12,0 foizi — tug‘ma anomaliyalardan, 2,8 foizi — yuqumli va parazitar kasalliklardan, 2,1 foizi — baxtsiz hodisa, zaharlanish va jarohatlanishlardan, 0,7 foizi — ovqat hazm qilish a’zolari kasalliklaridan va 5,5 foizi — boshqa kasalliklardan vafot etgan.
Aholining tabiiy o‘sishi 477,5 ming kishini tashkil etib, 2018-yil mos davriga nisbatan 36,7 ming kishiga o‘sgan. O‘tgan yilning yanvar—sentabr oylarida aholi sonining o‘sishi 440,8 ming kishini tashkil qilgan.
Ma’lum qilinishicha, FHDYo organlari tomonidan 194,9 mingta nikoh qayd etilgan, mos ravishda 1000 nafar aholiga nisbatan nikoh tuzish koeffitsiyenti 7,8 promilleni tashkil qilgan. 2018-yilning mos davriga nisbatan sezilarli kamayish Qashqadaryo (7,0 foiz), Xorazm (4,2 foiz), Samarqand (3,4 foiz) va Farg‘ona (2,1 foiz) viloyatlarida kuzatilgan.
FHDYo organlari tomonidan 23,6 mingta nikohdan ajralish holati qayd etilgan bo‘lib, mos ravishda 1000 nafar aholiga nisbatan nikohdan ajralish koeffitsiyenti 0,9 promilleni tashkil etgan. 2018-yilning mos davriga nisbatan sezilarli kamayish Samarqand (8,8 foiz), Navoiy (7,6 foiz) va Andijon (6,9 foiz) viloyatlarida qayd etilgan.
Ajrimlar sonida 2018-yilning mos davriga nisbatan yuqori o‘sish sur’atlari Toshkent shahri (8,8 foiz) va Jizzax (3,9 foiz) viloyatiga to‘g‘ri kelgan.
2019-yilning dastlabki to‘qqiz oyida respublika bo‘yicha ko‘chib kelganlar soni 117,6 ming kishini, shu jumladan, 115,6 ming kishi respublika hududlaridan, 2 ming kishi xorijiy mamlakatlardan, ko‘chib ketganlar soni esa 126,1 ming kishini, shundan 115,6 ming kishi respublika hududlariga, 10,5 ming kishi xorijiy mamlakatlarga, tashkil qilgan. Migratsiya saldosi minus 8,5 ming kishi bo‘lib, 2018-yilning mos davrida minus 11,7 ming kishi bo‘lgan.
O‘zbekistonga doimiy yashash uchun kelganlar soni 1971 kishini tashkil etib, ularning 31,1 foizi Qozog‘iston, 23,1 foizi Tojikiston, 22,8 foizi Rossiya, 13,3 foizi Qirg‘iziston va 9,7 foizi boshqa davlatlardan kelgan.
Izoh (0)