Ўзбекистон Давлат статистика қўмитаси ҳисоботига кўра, 2019 йилнинг январь—сентябрь ойларида аҳоли умумий даромадлари 251,8 триллион сўмни, номинал ўсиш суръати эса 22,3 фоизни ташкил этган.
Қўмита томонидан маълум қилинишича, истеъмол нархларининг ўзгариши сабабли ўтган йилнинг мос даврига нисбатан аҳоли умумий даромадларининг ўсиши 7,1 фоизни ташкил қилган.
2019 йилнинг дастлабки тўққиз ойида аҳоли жон бошига умумий даромадлар 7,5 миллион сўмни, номинал ўсиш эса 20,0 фоизни, реал ўсиш суръати 5,2 фоизни ташкил этган.
Аҳоли жон бошига ўртача умумий даромадлар Тошкент шаҳрида 14,7 миллион сўмга ҳамда Навоий вилоятида 11,6 миллион сўмга, Бухоро вилоятида 9,4 миллион сўмга ва Хоразм вилоятида 7,9 миллион сўмга тенг бўлган. Мазкур вилоятлар аҳоли жон бошига ўртача умумий даромадлари бўйича ўртача республика даражасидан юқори кўрсаткичларни қайд этган.
Аҳоли жон бошига даромадларнинг энг қуйи кўрсаткичлари эса Қорақалпоғистон Республикаси (5,4 миллион сўм) ҳамда Наманган (5,9 миллион сўм) ва Фарғона вилоятларида (5,8 миллион сўм) кузатилган.
Аҳоли жон бошига умумий даромадларнинг энг юқори реал ўсиши Тошкент шаҳри ва Андижон вилоятида кузатилган бўлиб, мос равишда 12,2 ва 7,1 фоизни ташкил қилган. Шунингдек, республика даражасидан юқори кўрсаткичлар Навоий (6,9 фоиз), Қорақалпоғистон Республикаси (6,6 фоиз), Сирдарё (5,6 фоиз) ҳамда Наманган (5,7 фоиз) вилоятларида қайд этилган.
Изоҳ (0)