Қибрайда «Г.Қ.Н.» ҳамда «Г.С.Э.» масъулияти чекланган жамиятлари жуда кўп миқдорда савдо қоидаларини бузганлиги юзасидан жиноят иши қўзғатилди. Бу ҳақда Бош прокуратура матбуот хизмати хабар берди.
Аниқланишича, «Г.Қ.Н.» ҳамда «Г.С.Э.» масъулияти чекланган жамиятлари раҳбари Улуғбек Т. ва бошқалар корхоналар томонидан бажарилган ишлар ва товарлар реализациясидан келиб тушган 7,3 миллиард сўм пул маблағларини солиқ тўловларини тўламаслик мақсадида ҳисоботларда яшириб, бюджетга тўланиши лозим бўлган 1,4 миллиард сўм солиқ ва бошқа мажбурий тўловларни тўлашдан қасддан бўйин товлаган.
Шунингдек, маҳсулотлар сотувидан тушган 4,8 миллиард сўм нақд пул маблағларини банк муассасасига топширмасдан жуда кўп миқдорда савдо қоидаларини бузган.
Мазкур ҳолат юзасидан Улуғбек Т. ва бошқаларга нисбатан Жиноят кодексининг 184 (Солиқлар ёки бошқа мажбурий тўловларни тўлашдан бўйин товлаш) ва 189-моддалари (Савдо ёки хизмат кўрсатиш қоидаларини бузиш) билан жиноят иши қўзғатилиб, тергов ҳаракатлари ўтказилмоқда.
Бундан аввал Қибрайда давлат корхонаси молиячиси 581 миллион сўмни «моддий ёрдам», «мукофот» сифатида талон-торож қилгани ҳақида хабар берилган эди.
Изоҳ (0)