Олий Мажлис Қонунчилик палатасининг 2019 йил 22 октябрдаги мажлисида депутатлар бугунги кунда ҳамманинг диққат марказида турган ва долзарб аҳамият касб этаётган аҳолини иш билан таъминлаш масаласига эътибор қаратди. Бу ҳақда Қонунчилик палатаси ахборот хизмати хабар берди.
Мажлисда аҳоли бандлигини таъминлаш борасида бир қатор вазифа ва топшириқларни ўзида қамраб олган янги таҳрирдаги «Аҳолини иш билан таъминлаш тўғрисида»ги қонун лойиҳаси муҳокама қилинди.
Мазкур қонун лойиҳаси парламент қуйи палатасига келиб тушганидан сўнг жамоатчилик, мутахассислар, экспертлар ўртасида ҳамда партиялар фракцияларида ҳар томонлама муҳокама қилинган.
Таъкидланишича, Президентининг 2019 йил 17 январдаги фармонига асосан ишлаб чиқилган ушбу лойиҳанинг яратилишига бир нечта объектив сабаблар туртки бўлган. Аввало, 1998 йилда қабул қилинган амалдаги қонун меҳнат бозорининг ҳозирги ҳолати ва воқеликни акс эттирмайди. Меҳнат ва бандлик соҳасидаги мавжуд муаммоларни, долзарб масалаларни ҳал қилишга қаратилган амалдаги нормалар қарийб яроқсиз ҳолга келган.
Қолаверса, меҳнат бозорини тартибга солишнинг янги воситалари, хусусан, тадбиркорликни рағбатлантириш, ўзини ўзи банд қилиш, шахсий томорқа участкаларини ривожлантириш ва ишсизларни касб-ҳунарга қайта ўқитиш, иш стажини ҳисобга олишда янги ахборот тизимларидан фойдаланиш кабилар борасида қонунчилик реал ҳаётдан ортда қолган.
Қайд этилишича, сўнгги 20 йил ичида меҳнат бозорида жиддий ўзгаришлар рўй бергани ҳисобга олинса, самарасиз, эскирган норма ва қоидалардан иборат бўлиб қолган айни соҳадаги қонун ҳужжатларини янгилашга табиий эҳтиёж туғилган. Меҳнат миграциясини тартибга солиш билан боғлиқ янги муносабатларни қонуний тартибга солиш даври аллақачон келгани барчага маълум, дейилади палата хабарида.
Айни мақсадга эришиш учун қонунда бандлик соҳасидаги давлат сиёсатини амалга оширишнинг молиявий воситалари ҳисобланган Жамоат ишлари жамғармаси, Хорижда меҳнат фаолиятини амалга оширувчи фуқаролар ҳуқуқлари ва манфаатларини қўллаб-қувватлаш жамғармаси каби тузилмалар фаолияти аниқ-тиниқ белгилаб берилмоқда.
Хабар берилишича, мазкур қонун лойиҳасининг асосий хусусияти ва ажралиб турадиган жиҳати, у тўғридан-тўғри амал қилувчи нормалардан ташкил топган. Яъни, лойиҳа учта қонун, Ўзбекистон Республикаси Президентининг 12 та фармон ва қарорида, Вазирлар Маҳкамасининг бандлик ва меҳнат бозорини тартибга солиш, меҳнат миграциясини ташкил этиш бўйича қабул қилинган 40 дан зиёд меъёрий ҳужжатида кўзда тутилган ҳуқуқий нормаларни ўзида жамлаган.
Изоҳ (0)