Қибрайда Қишлоқ хўжалиги вазирлиги ҳузуридаги «Маъмурий-хўжалик хизмати» ДУКнинг 581 миллион сўм маблағлари талон-торож қилингани аниқланди. Бу ҳақда «Дарё»га Бош прокуратура матбуот хизмати хабар берди.

Маълум бўлишича, мазкур корхонанинг молия ҳисоби ва ҳисоботи бўлими бошлиғи Н.Қ. 2019 йилнинг ўтган даврида, ҳеч қандай асоссиз корхонанинг 581,7 миллион сўм пул маблағларини «моддий ёрдам», «байрам муносабати билан мукофот» ва «хизмат сафари харажатлари» кўринишида ўзининг ва муқаддам корхонада мутахассис бўлиб ишлаган қариндоши О.Н.нинг пластик картасига ўтказиб, талон-торож қилган.

Мазкур ҳолат юзасидан Н.Қ.га нисбатан Жиноят кодексининг 167-моддаси (Ўзлаштириш ёки растрата йўли билан талон-торож қилиш) билан жиноят иши қўзғатилган. Ушбу моддада энг кам ойлик иш ҳақининг 100 бараваригача миқдорда жарима ёки 240 соатгача мажбурий жамоат ишлари ёхуд 1 йилгача ахлоқ тузатиш ишлари жазоси белгиланган.

Ҳозирда тергов ҳаракатлари ўтказилмоқда.

Бундан аввал Тошкентда банк ходими бир неча шахслар билан тил бириктириб кредитга ажратилган 200 млн сўмни талон-торож қилгани, фуқаро инвесторни алдаб, 240 млн сўмини ўзлаштиргани, Бухородаги компаниянинг 340 млн сўмини алдов йўли билан олиб, нақдлаштирган шахсларга жиноят иши очилгани ҳақида хабар берилган эди.