Инвестициялар асосан инфратузилмаси етарли даражада бўлган ҳудудларга киритилмоқда, чекка ҳудудлар эса эътибордан четда қолмоқда. Бу ҳақда Андижон вилояти ҳокими Шуҳрат Абдураҳмонов 19 октябрь куни Open Andijan халқаро инвестиция форуми доирасида ОАВ вакиллари билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда «Дарё» мухбири Open Andijan халқаро инвестиция форумида Андижон вилоятининг ишсизлик даражаси юқори ва саноати ривожланмаган туманларига инвесторларни жалб қилиш ишлари қай даражада олиб борилгани ҳақидаги савол билан вилоят ҳокимига мурожаат қилди.
Ҳокимнинг сўзларига кўра, Президент Шавкат Мирзиёев май ойида Андижонга қилган сафари давомида вилоятнинг саноати ривожланмаган, ишсизлик даражаси юқори бўлган туманларида янги лойиҳаларни ишга тушириш вазифасини қўйган.
«Ҳар бир шаҳар ва туманда инвесторлар учун қандай захиралар борлигини аниқлаш режалаштирилган. Масалан, Хўжаобод, Булоқбоши, Марҳамат туманлари тоғолди ҳудудлари бўлиб, у ерлар цемент, мармар ва бошқа қурилиш материалларини ишлаб чиқариш учун қулай. Айрим туманларда мева-сабзавот етиштирилади, лекин уни қайта ишлаш 5—10 фоиздан ошмайди», — деди Шуҳрат Абдураҳмонов.
Унинг таъкидлашича, инвестор келиши учун биринчи навбатда инфратузилма — электр энергияси, йўл, газ, сув керак. Лекин санаб ўтилган ушбу қулайликлар вилоятнинг барча туманларида ҳам йўқ.
«Тан оламан, ҳамма туманларда шароит бир хил, инфратузилма гуллаб кетган, деб айтолмайман. Шу боис инвесторлар шаҳар атрофига кўпроқ, чекка ҳудудларга эса камроқ кириб келмоқда. Ишсизлик юқори ва саноати паст бўлган туманларга инвесторларни жалб қилишга ҳаракат қиляпмиз. Бу фақат бизга боғлиқ эмас, инвесторларнинг ҳам ўз танлови бор», — деди вилоят раҳбари.
Изоҳ (0)