Ўзбекистонда ОАВ тўртинчи ҳокимиятдан биринчи ҳокимият даражасига кўтарилди. Бу ҳақда Андижон вилояти ҳокими Шуҳратбек Абдураҳмонов 19 октябрь куни Open Andijan биринчи халқаро инвестиция форуми доирасида журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
«ОАВ тўртинчи ҳокимият дейилади. Ўйлашимча, бугун Ўзбекистонда журналистика биринчи ҳокимият даражасига кўтарилди. Мен журналистлар билан ишлашга, қандай саволлар бўлса, жавоб беришга ҳамиша тайёрман», — деди Абдураҳмонов.
Ўз навбатида, Андижон ҳокими журналист ва блогерлардан мавзуларни ёритиш у ёки бу ҳодисага муносабат билдириш вақтида Ўзбекистонда 25 йилда йиғилиб қолган муаммоларни ҳисобга олишларини сўради.
«Республика 25 йил ёпиқ тизимда ишлади. Халқ дардини эшитмаганмиз, улар билан мулоқот ҳам қилмаганмиз. Буни тан олиб айтиш керак. Ҳеч ким фаришта эмас ва ўзини оқламайди. Муаммолар гирдобида қолиб кетганмиз. Халқнинг дарди тўлиб-тошиб кетган экан. Муаммолар ечиляпти, яна олдимизда ҳал қилиниши керак бўлган масалалар турибди», — деди ҳоким.
Изоҳ (0)