Мексика миллий полицияси Синалоа штатининг Кулиакан шаҳридаги отишмадан сўнг ҳозирда АҚШда умрбод қамоқ жазосини ўтаётган наркобарон Хоакин Гусман (Эль Чапо)нинг ўғли Овидиони ҳибсга олди. Бу ҳақда Meduza хабар бермоқда.
Бироқ наркокартел полицияни қуршаб олиб, шаҳарни деярли қамал ҳолатига келтирганидан сўнг уни қўйиб юборишга тўғри келди.
Мамлакат хавфсизлик вазири Альфонсо Дурасога кўра, Миллий гвардия ҳарбийлашган патрули 17 октябрь, пайшанба куни Кулиакандаги уйларнинг бирига жойлашиб олган кишилар ҳужумига дуч келган. Полициячилар уйга кириб, Гусманнинг ўғли Овидиони ҳибсга олган, бироқ 30 кишидан иборат патрул улардан сон жиҳатдан кўп бўлган наркокартел кучлари томонидан қуршаб олинган. Полициячилар жонини сақлаш, жиноятчилар блокпост ўрнатиб, автомат қуролдан шиддатли отишмани бошлаган шаҳарда тинчлик ўрнатиш учун манзилни Овидиосиз тарк этишга қарор қилинган.
Кулиакан шаҳрига айни пайтда Мексика армияси ва полициясининг кучайтирилган қисмлари кирган.
Синалоа штати жамоат хавфсизлиги котиби Кристобаль Кастанеданинг маълум қилишича, отишма ва баррикадалардан ташқари можаро мобайнида қамоқхонадан 20 дан 30 нафаргача маҳкум ҳам қочишга улгурган. «Биз шаҳарда тўлиқ назорат ўрнатгунча фуқаролардан кўчаларни тарк этишни сўраймиз», — деди Кастанеда.
Гусманлар оиласи адвокатининг билдиришича, ҳозирда наркобароннинг ўғли тирик ва озодликда.
Изоҳ (0)