«ЙПХ ходими эмас, балки ҳайдовчилар ўзаро келиша олмай урушиб қолган». ИИВ Telegram’да тарқалган видеога муносабат билдирди

Ички ишлар вазирлиги Ахборот хизмати 14 октябрь куни Telegram’да тарқалган «ЙПХ ходими билан жанжал» номли видеолавҳа юзасидан муносабат билдирди.

Тошкент шаҳар Ички ишлар бош бошқармасининг маълумотига кўра, видеолавҳада акс этган ҳолат шу йилнинг 20 май куни соат 13:30 ларда пойтахтнинг Абай—Алишер Навоий кўчалари кесишган чорраҳада юз берган. Воқеа содир бўлган жойда йўл-патрул хизмати ходими ҳеч ким билан жанжаллашмаган. Аксинча, Spark русумли автомашина ҳайдовчиси ва у билан бирга бўлган ўртоғи Matiz русумли автомашина ҳайдовчиси билан ўзаро келиша олмай, бир-бирларини уятли сўзлар билан ҳақоратлаб, жамоат жойида муштлашган.

«Мазкур уч нафар фуқарога нисбатан Маъмурий жавобгарлик тўғрисидаги кодекснинг 183-моддасига мувофиқ баёномалар расмийлаштирилиб, қонуний чора кўриш учун Шайхонтоҳур тумани маъмурий судига юборилган», — дейилади хабарда.

18 июнь куни Шайхонтоҳур тумани маъмурий суди А.А., Ш.Х. ва Б.Х.ларни Маъмурий жавобгарлик тўғрисидаги кодекснинг 183-моддасида («Майда безорилик») назарда тутилган ҳуқуқбузарликни содир этганликда айбли деб топиб, уларнинг ҳар бирига нисбатан энг кам иш ҳақининг 3 баравари миқдорида жарима жазоси тайинлаган.