Марказий банк Ўзбекистонда захира активлари 27,9 млрд долларни ташкил қилиши кутилаётганини маълум қилди

Марказий банк томонидан 2019 йилнинг 9 ойи якуни бўйича дастлабки тўлов баланси тайёрланди.

Таъкидлаш зарурки, тўлов баланси тезкор маълумотлар ва экспертлик баҳолашлари асосида тузилганлигини инобатга олиб, ундаги айрим кўрсаткичлар якуний маълумотлар билан фарқ қилиши мумкин, дейилади хабарда.

Дастлабки ҳисоб-китобларга кўра, тўлов балансининг жорий операциялар ҳисоби дефицити 2018 йилнинг мос даврига нисбатан 50 фоизга (3,1 миллиард доллардан) камайиб, 2019 йилнинг 9 ойида 1,6 миллиард долларни ташкил қилади.

Жаҳон бозорида Ўзбекистоннинг биржа товарлари учун мақбул нархлар шаклланганлиги товарлар экспорти ҳажмини 11,1 миллиард долларгача ўсишига замин яратди (ўтган йилнинг мос даврида — 7,3 миллиард доллар). Товарлар экспортининг ўсганлиги маҳсулотларни хорижга юклаб жўнатиш ҳажмининг ошиши билан бир қаторда унинг қиймати ўсиши билан ҳам боғлиқдир.

Товарлар импорти ўтган йилнинг мос даврига (12,7 миллиард доллар) нисбатан 15,6 миллиард долларга етди. Импортнинг энг салмоқли ўсиши (мос равишда 21 фоиз ва 26 фоиз) машина ва ускуналар ҳамда транспорт воситалари (жами импортнинг 32 фоизи) тўғри келиб, жами импортнинг 13 фоизини ташкил қилди. Натижада, савдо балансининг салбий салдоси 2018 йилнинг 9 ойига нисбатан 17 фоизга яхшиланиб, 4,5 миллиард долларни ташкил этди.

Бирламчи даромадлар ва трансфертларнинг ижобий салдоси трансчегаравий пул ўтказмаларининг (4,2 миллиард доллар) мутаносиб ўсиши ҳисобига 13 фоизга ошди. Ўз навбатида, норезидентларнинг инвестицион даромадлари (ссудалар ва хорижий инвестициялар) 5,6 фоизга ўсиб, 1,4 миллиард долларга етди.

Молиявий ҳисоб (резерв активлари амалиётларидан ташқари) дастлабки маълумотларга кўра, манфий салдони ташкил қилиб, 5,3 миллиард долларга етади (ўтган йилнинг мос даврида 0,7 миллиард доллар). Капиталнинг соф кирими давлат бошқаруви сектори операциялари ҳамда хорижий кредит линиялари жалб қилиниши, шунингдек, Ўзбекистоннинг суверен облигациялари жойлаштирилиши билан боғлиқ.

Захира активлари 2019 йилнинг 1 октябрь ҳолатига 27,9 миллиард долларни ташкил қилиши кутилмоқда ва бу кўрсаткич Ўзбекистоннинг қарийб 13 ойлик импортини молиялаштириш учун етарли (тавсия қилинган даража 3 ой).

Ўзбекистоннинг 2019 йилнинг 9 ойлик тўлов баланси, халқаро инвестицион позицияси ва ташқи қарзининг кўрсаткичларининг якуний хисоботи ТБҚ6 методологиясига мувофиқ тузилиб, фойдаланувчиларга декабрь ойи якунига қадар тақдим қилинади.