Мактабгача таълим вазирлиги ишчи гуруҳи Самарқанд шаҳридаги 80, 98 ва 106-сонли мактабгача таълим ташкилотлари (МТТ) тарбияланувчилари заҳарланиши ҳолатларини ўрганиб чиқди. Бу ҳақда вазирлик матбуот хизмати хабар берди.
Қайд этилишича, 10—11 октябрь кунлари жами 31 нафар тарбияланувчи касалхонага ётқизилган. Айни пайтда болалар аҳволи қониқарли бўлиб, уларнинг 25 нафари касалхонадан чиқди.
Заҳарланиш сабаблари Давлат санитария-эпидемиология назорати маркази томонидан болалар анализларига, шунингдек, ишчи гуруҳ томонидан озиқ-овқат маҳсулотлари, ошхона жиҳозлари, ходимлар қўли ва кийимларидан олинган суртмалар асосида аниқланади.
Вазирлик 80, 98 ва 106-сонли боғчалардаги шарт-шароитларни ўрганиб, уларда овқатланиш ауцорс усули билан ташкил этилганини аниқлаган. Болалар саломатлигига зарар етказиши мумкин бўлган қўпол қоидабузарликлар аниқланмаган.
Қуйида текширувлар натижаси келтирилди:
106-сонли МТТ
- Болалар сони: 9 октябрь куни — 285, 10 октябрь куни — 257 нафар тарбияланувчи
- Заҳарланган болалар сони: 7
- МТТда марказлаштирилган сув таъминоти ва канализация ҳамда қозонхона ишлайди. Барча ходимлар тиббий кўрикдан ўтказилди. Озиқ-овқат маҳсулотлари санитария қоидаларига мувофиқ музлатгичда сақланади, суткалик намуналар олинади.
- Болалар сони: 9 октябрь куни — 484, 10 октябрь куни — 458 нафар тарбияланувчи
- Заҳарланган болалар сони: 20
- МТТда марказлаштирилган сув таъминоти ва канализация ҳамда қозонхона ишлайди. Ходимлар режали тиббий кўрикдан ўтиш жараёнида.
- Озиқ-овқат маҳсулотлари санитария қоидаларига мувофиқ омбордаги иккита музлатгичда сақланади. Ошхонада музлатгич мавжуд эмас, гўшт ва сабзавотларни ювиш учун ванна ўрнатилмаган, хом гўшт ва сабзавотлар учун столлар эса иссиқ цехда жойлашган. Ҳамшира хонасида бир музлатгичдан суткалик намуналар сақланмоқда. Хожатхоналар дезинфекция қилинмаслиги аниқланди.
- Болалар сони: 9 октябрь куни — 232, 10 октябрь куни — 326 нафар тарбияланувчи
- Заҳарланган болалар сони: 4
- МТТда марказлаштирилган сув таъминоти ва канализация ҳамда қозонхона ишлайди. Барча ходимлар тиббий кўрикдан ўтди.
- Гуруҳларда унитазлар ва раковиналар сони етарли эмаслиги аниқланди. Озиқ-овқат маҳсулотлари омбордаги сотвутгичда сақланади, маҳсулотларни сақлаш қоидаларини бузиш ҳолатлари мавжуд (тухум ва шакар ёнма-ён сақлаб келинмоқда).Ошхонада музлатгич мавжуд эмас, бир музлатгичдан суткалик намуналар ҳамшира хонасида сақланади, ошхона идиш-товоқларини ювиш учун ванналар ўрнатилмаган.
Маълумот учун, сўнгги бир ой давомида Ўзбекистонда овқатдан оммавий заҳарланиш ҳолатлари бир неча бор юз берди. Хусусан, 20 сентябрь куни Наманганда ўтказилган тўй маросимида 18 киши, 27 сентябрь куни Бекободдаги 15-мактабгача таълим ташкилотида 15 нафар бола, 30 сентябрь куни Андижондаги хусусий мактабда 82 нафар бола, 8 октябрь куни Андижондаги 35-мактабда 27 киши, хусусан, 24 нафар бола овқатдан заҳарланганиб, касалхонага ётқизилган.
Самарқанд вилоятининг ўзида эса охирги бир ой давомида камида икки марта шундай фавқулодда вазият кузатилди: 14 сентябрь куни бўлиб ўтган тўйдан сўнг 10 дан ортиқ одам шифохонага мурожаат қилган, 6 октябрь куни эса Самарқанд шаҳридаги хот-дог шохобчаларидан бирида овқатланган камида 24 киши эртаси куни касалхонага ётқизилган.
Изоҳ (0)