Uzbekistan Airways авиакомпаниясининг 10 октябрь куни «Тошкент—Екатеринбург» йўналиши бўйлаб парвоз қилган HY611 рейси Тюмендаги захира аэродромига йўналтирилди, дея хабар бермоқда авиакомпания матбуот хизмати.
Бунга Екатеринбургдаги Кольцово аэропортининг техник сабабларга кўра ёпилгани сабаб бўлган. Самолёт бортида 103 киши бўлган. Аэропорт очилгач, Тюменда бўлиб турган самолёт ўз манзили — Екатеринбургга йўл олади.
«РИА Новости»нинг хабар беришича, 10 октябрь куни Кольцово аэропортига Ан-12 ҳарбий-транспорт самолёти авариявий қўнишни амалга оширган. Қўниш вақтида ҳаво кемасида ёнғин чиққан, оловни ўчиришга муваффақ бўлинган. Фавқулодда вазиятга самолёт шассисининг чиқмаганлиги сабаб бўлган бўлиши мумкин. Аэропорт фаолияти тўхтатилган.