Президент Шавкат Мирзиёев 9 октябрь куни Олмазор туманида янги жойда қад ростлаган Тошкент чинни заводини бориб кўрди, дея хабар бермоқда Президент матбуот хизмати.
Мавзуга доир: Шавкат Мирзиёев Olmazor City’нинг қурилиши билан танишди
1952 йилда ишга туширилган мазкур заводда чойнак, пиёла, коса, тарелка, лаган, кўза каби миллий услубдаги буюмлар, сувенирлар тайёрланган. «Оқ олтин», «Тонг», «Узум», «Товус» каби тўпламлар халқаро кўргазмаларда олтин медалларга сазовор бўлган, кўплаб мамлакатларга экспорт қилинган. Аммо кейинчалик завод хусусийлаштирилиб, ишлаб чиқариш тўхтаб қолган.
Президент топшириғига мувофиқ, завод фаолиятини қайта тиклаш мақсадида «Алоқабанк» томонидан умумий қиймати 87 миллиард сўмлик лойиҳа амалга оширилди. Фойдаланилмаётган объект реконструкция қилиниб ҳамда қўшимча бинолар қурилиб, Хитойнинг Ҳуангганг Ҳуауао Зҳонгбо Клин Technology компанияси ускуналари ўрнатилди. 300 та иш ўрни яратилди.
Заводда йилига 30 миллион дона ошхона идишлари, сувенирлар, биноларнинг ички безаклари ишлаб чиқарилади. 100 фоиз маҳаллий хом ашёдан фойдаланилади. Маҳсулотлар импорт ўрнини тўлдириб, Россия, Украина, Грузия, Озарбайжон ва Марказий Осиё давлатларига экспорт ҳам қилинади.
«Мутасаддилар билан суҳбатда завод фаолиятини кенгайтириб, кластерга айлантириш, янада кўп хотин-қизлар ва ёшларни ишга жалб этиш бўйича кўрсатмалар берилди», — дейилади Президент матбуот хизмати ахборотида.
Қўшимча қилишларимча, Шавкат Мирзиёев заводга ташриф давомида чинни буюмлар музейини кўздан кечирган, заводда ишлаган меҳнат фахрийлари билан суҳбатлашган.
Изоҳ (0)