Президент Шавкат Мирзиёев 9 октябрь куни Олмазор туманидаги Olmazor Business City ишбилармонлик маркази қурилиши билан танишди, дея хабар бермоқда Президент матбуот хизмати.
Президент 2018 йил 29 июнь куни Тошкентнинг Олмазор туманида Olmazor Business City ишбилармонлик маркази лойиҳаси билан танишган эди. Бунинг учун Кичик ҳалқа йўли ва Янги Олмазор кўчаси ўртасида қарийб 24 гектар ер ажратилиб, 2019 йил февралда қурилиш ишлари бошланган эди.
Майдон 6 та лотга бўлинган бўлиб, биринчи ва иккинчи лотларда савдо маркази, офислар ва кўнгилочар масканлар бунёд этилмоқда. Уч, тўрт ва бешинчи лотларда 2 100 хонадонга мўлжалланган 28 та кўп қаватли уй, олтинчи лотда 300 ўринли мактабгача таълим муассасаси ҳамда 500 ўринли мактаб қурилмоқда.
Уйларнинг биринчи қаватидан савдо дўконлари ўрин олади. Хонадонларда алоҳида иситиш тизими ўрнатилади. Деворлар етти қатламдан иборатлиги, жумладан базалт толаси билан қоплангани қишда иссиқ, ёзда салқин ҳароратни яхши сақлайди.
«Давлатимиз раҳбари 9 октябрь куни ушбу мажмуага ташриф буюриб, бунёдкорлик ишларини кўздан кечирди. Қурилишда қўлланилаётган инновацион, энергия тежамкор технологияларга алоҳида эътибор қаратди», - дейилади Президент матбуот хизмати ахборотида.
Бинокорлик ишларининг бориши, ўзига хос жиҳатлари ҳақида маълумот берилди. Қурилишда маҳаллий материаллардан фойдаланилаётгани, уйлар ҳам тўлиқ Ўзбекистонда ишлаб чиқарилган маиший техника ва мебеллар билан жиҳозланиши таъкидланди.
Изоҳ (0)